Pas reagimit të kryeministrit Edi Rama dhe ministrit të Jashtëm në Detyrë, Gent Cakaj, mbi parullën e shkruar në murin e pallatit të ambasadorit të OSBE në Tiranë, sot ka reaguar edhe deputetja Rudina Hajdari.
Në një post në Twitter ajo flet në emër të “shumicës së heshtur” në Shqipëri dhe duke e cilësuar si “të papranueshëm” reagimin ndaj ambasadorit Borchardt bën edhe thirrje që personat me të tilla qëndrime duhen bërë përgjegjës.
“Është një sjellje e papranueshme të tregosh këtë mungesë respekti ndaj Ambasadorit të OSBE në Shqipëri i cili ka qenë një mbështetës i procesit demokratik në vendin tonë. Kjo nuk reflekton atë se çfarë mendon shumica e heshtur në Shqipëri. Ata që nxisin të tilla sjellje dhe bëjnë veprime të tilla duhet të përgjigjen për to” shkruan Hajdari në Twitter.
Të dielën kreu i PD-së, Luzlim Basha u pyet disa herë për kërcënimet ndaj ambasadorit të OSBE-së, por tha se nuk kishte dijeni. Ndërsa më vonë nuk e fshehu ironinë.
“Nuk kam asnjë informacion që ndonjë ambasador të jetë kërcënuar. Nëqoftëse keni, ndajeni me mua. Edhe njëherë si ishte parulla? (‘Borchardt turp të kesh’, iu përgjigj një gazetare) Edhe njëherë se nuk të dëgjoj, edhe njëherë të lutem? (Pas përsëritjes…) No comment!”, ishin fjalët e Bashës./ Opinion.al
