Në 3-vjetorin e Reformës në Drejtësi, është publikuar botimi parlamentar “Reforma ne Sistemin e Drejtësisë”, të cilën kreu i Kuvendit, Ruçi e cilësoi një dhuratë të bukur që i bëhet vendit në prag të 100 vjetorit të parlamentarizmit shqiptar.
Në fjalën e tij gjatë promovimit të këtij botimi, Ruçi e cilësoi reformën si një moment reflektimi për të gjithë, ndërsa theksoi se ajo është e panegociueshme dhe e pakthyeshme.
Ruçi u shpreh se reforma në drejtësi nuk është një reformë si gjithë të tjerat, teksa nuk nguroi ta quajë atë një meritë ekskluzive të Kuvendit të Shqipërisë. Ai shtoi se nuk njihte ndonjë rast tjetër, ku bashkëpunimi midis ligjvënësve dhe ekspertëve të ketë dhënë një produkt kaq madhor sa korpusi i ligjeve të reformës në sistemin e drejtësisë.
Ruçi nënvizoi gjithashtu se reforma ecën paralelisht në tri drejtime: realizimin e ndryshimeve ligjore; ngritjen e bërjen funksionale të institucioneve të reja dhe kryerjen e rivlerësimit kalimtar të gjyqtarëve e prokurorëve./Opinion.al
