Të tjera detaje janë zbardhur lidhur me rrëzimin e avionit në livadhet e Vremoshit në Kelmend të Malësisë së Madhe.
Kryeplaku i Vremoshit, Prekë Vushaj shprehet për mediat se kaq njoftuar policinë sapo është vënë në dijeni për ngjarjen.
Sipas tij, policia i ka kërkuar që mos lejojë asnjë person që ti afrohet avionit, deri në momentin e mbërritjes së autoriteteve.
Vushaj tregon dhe dëshminë e një bariu që ndodhej pranë zonës ku bëri ulje të detyrueshme avioni, ndërsa ende nuk dihet se kush janë personat që ndodheshin në avion dhe ata që erdhën i morën me me makinë.
Duke cituar një bari të zonës që kishte parë ngjarjen, kryeplaku thotë se pilotët janë shqiptarë pasi kanë folur shqip. Sipas tij, në momentin që bariu është afruar për të parë ngjarjen, e kanë paralajmëruar që të mos afrohet pasi kishin frikë nga ndonjë shpërthim i mundshëm.
Si ka ndodhur ngjarja?
Prekë Vushaj: Unë e kam marrë vesh nga policia e Koplikut në Malësinë e Madhe. Ata më telefonuan dhe më treguan se është rrëzuar një avion. Unë i thashë se ku ka ndodhur dhe ata më orientuan duke më thënë se është në lagjen Velipojë të Vermoshit. Unë u nisa menjëherë dhe lashë të gjitha punët duke menduar se mund të ketë ndonjë të lënduar. Nuk gjeta asnjë njeri përveç një bariu të zonës Kolë Vuçaj. Ai me tha se avioni ishte ulur rreth 1 km nga vendi ku ndodhej dhe më pas është ngritur edhe njëherë por në tentativë për tu kthyer ka dëgjuar krismën dhe avioni ka bërë uljen e detyruar. Dikush prej atyre i ka folur shqip duke i thënë mos u afroni se është rrezik dhe mbase mund ta kenë pasur rrezik se mund të shpërthejë avioni. Më pas u afrova dhe e kam gjetur avionin e rrëzuar ashtu siç është dhe siç e keni parë. Policia më thanë rri aty dhe mos lër askend të afrohet deri që të vijmë ne dhe kam qëndruar aty duke pritur.
Avioni është ngritur në një vend tjetër para se të bënte uljen e detyruar?
Prekë Vushaj: Siç thotë bariu avioni rreth 1 km më tutje është ulur dhe ka qëndruar një gjysëm ore sipas deklarimeve të tija dhe pas gjysëm ore është ngritur sërish dhe se a ka patur defekt atje që herën e parë apo ka ndodhur defekti pasi është ngritur këtë nuk e dimë sepse policia ka gjetur edhe telat që tregon se ata kanë mbetur pas një gardhi tjetër. Askush nuk e di se çfarë u ka ndodhur atyre. Mesa duket ka patur një ulje të detyrueshme sepse avioni është ulur në një vend të papërshtatshëm sepse i kanë hyrë telat e gardhit. Avioni është përplasur me një pemë kumbull dhe me shelqe si dhe një pishë dhe duket aty në vendngjarje kjo. Duket si diçka aksidentale.
Ka ardhur një fouristradë për t’i marrë?
Prekë Vushaj: Çobani thotë që po sepse unë nuk e kam parë. Nuk dihet se kush janë ata persona që kanë qenë në avion dhe në fouristradë.
A mund të ketë lidhje me drogën kjo ngjarje?
Prekë Vushaj: Nuk ma merr mendja sepse në këtë zonë asnjëherë nuk është mbjellë. Të themi realitetin nuk ka as kush ta mbjellë drogën këtu sepse kanë mbetur vetëm plaka e pleq, vetëm nëse vjen ndonjë jabanxhi dhe e mbjell. Është shpopollarizuar sepse kanë ikur njerëzit komplet nga këtu.
Në pjesët e malit keni dyshime se ka kultivin të lëndëve narkotike?
Prekë Vushaj: Në male edhe mund të ketë, atë nuk e di. Rreth 12 km nga këtu një muaj më parë është gjetur një parcelë dhe policia ka arrestuar një person dhe është asgjësuar ajo sasi droge. I arrestuari ishte një punëtor që e kishin dërguar për të ngulur disa shkopinj. Shenja të drogës në këtë zonë por avioni nuk besoj se ka lidhje me drogën por asnjëherë nuk i dihet. Unë për vete nuk dyshoj se nuk ka vend për t’u mbjellë sepse nuk ka tokë. Duhet të jenë dy tre dynym të paktën por është pyll komplet dhe aty në fushë është e kontrollueshme por gjithsesi gjë pa u bërë nuk po lihet në ditët e sotme dhe asnjëherë nuk i dihet.
