Kryeministri i Kanadasë, Justin Trudeau, tha se do të kërkojë “drejtësi” për 57 kanadezët e vrarë në bordin e avionit ukrainas Boeing 737, i cili u rrëzua javën e kaluar.
Ai premtoi se do të kërkojë përgjigje nga Irani dhe nuk do të ndalet derisa ta marrë.
“Kjo tragjedi nuk do të duhej të ndodhte kurrë. Dua t’ju siguroj se e keni mbështetjen time të plotë gjatë kësaj kohe jashtëzakonisht të vështirë. Nuk do të ndalemi derisa të marrim përgjigje”, tha Trudeau, duke iu drejtuar një turme prej rreth 2,300 njerëzish, kryesisht të afërm e miq të viktimave.
Kujtojmë se Irani pranoi se ushtria e tij kishte goditur gabimisht avionin ukrainas duke shkaktuar vdekjen e 176 njerëzve në bord. Presidenti iranian, Hassan Rouhani tha se ngjarja tragjike erdhi si pasojë e një gabimi njerëzor, teksa avioni ishte duke fluturuar pranë një zone sensitive që i përket Rojeve Revolucionare të Iranit.
Rrëzimi i avionit ndodhi vetëm disa orë pasi Irani kishte nisur një sulm me raketa balistike ndaj bazave irakiane në të cilat gjendeshin ushtarë amerikanë.
Prej ditës së parë të incidentit e deri të premten Irani kishte mohuar se ishte përgjegjës për rrëzimin e avionit, pavarësisht pohimeve të zyrtarëve amerikane e kanadeze të cilët ishin shprehur të bindur, bazuar në prova të shërbimeve të zbulimit, se një raketë iraniane ishte bërë shkak për rrëzimin e avionin ukrainas.
Ndërkohë pasi qeveria pranoi ngjarjen e rëndë në Teheran por dhe në qytete të tjera të Republikës Islamike kanë shpërthyer protesta kundër regjimit. /Opinion.al
