Presidenti Ilir Meta e ka cilësuar të turpshëm rrethimin me policë të godinës së Teatrit Kombëtar.
Në një reagim në Facebook, Meta shkruan se rrethimi me policë dhe përplasjet me artistët janë ngjarje të shëmtuara dhe të turpshme.
Prishja e godinës sipas Metës është një vendim abuziv e korruptiv kështu që forcat e policisë duhet të tregohen të përmbajtur ndaj protestuesve që po mbrojnë “një prej vlerave të trashëgimisë tonë historike, kulturore e kombëtare”.
Presidenti ka komentuar gjithashtu incidentin me regjisorin Budina duke u shprehur se “As sampistët e Ramiz Alisë nuk e kanë prekur me dorë Edmond Budinën në dhjetor ’90! “
Postimi i plotë i Presidentit Meta
Rrethimi me policë i Teatrit Kombëtar dhe përplasjet fizike me komunitetin e artistëve, të cilët janë aty në mbrojtjen e një prej vlerave të trashëgimisë tonë historike, kulturore e kombëtare, janë një ngjarje e shëmtuar dhe e turpshme.
I bëj thirrje Policisë së Shtetit të respektojë artistët dhe të mos i dhunojë ata fizikisht në ushtrimin e së drejtës së tyre për të protestuar ndaj një vendimi abuziv e korruptiv për prishjen e godinës së Teatrit, dhe as t’i lëndojë ata shpirtërisht, në respekt të dinjitetit njerëzor dhe kontributeve të vyera që kanë dhënë për artin e kulturën kombëtare.
As sampistët e Ramiz Alisë nuk e kanë prekur me dorë Edmond Budinën në dhjetor ’90!
Shumë turp! Shumë turp! Shumë turp! /Opinion.al
