E premtja dhe paraditja e shtunës do të mbizotërohet nga kthjellimet dhe alternimet e vranësirave. Ndërsa mesditën e të shtunës, meteorologët parashikojnë reshje shiu.
“Fundjava do të jetë e paqëndrueshme. Dita e shtunë do të nisë me kthjellime, vranësira të shpeshta dhe reshje, të cilat do të vijnë në pjesën e dytë të ditës. Ndërkohë dita e Dielë do të jetë me rrebeshe shiu, pothuajse që në orët e para të mëngjesit në pjesën më të madhe të territorit shqiptar. Reshjet do të jenë prezente edhe gjatë pasdites së ditës së Dielë, megjithatë intensiteti i tyre gjatë pasdites do të jenë në rënie. Mund ta përkufizojmë një fundjavë të paqëndrueshme”, tha meteorologia Lajda Porja.
Sinoptikanët parashikojnë se e shtuna do të jetë e ngrohtë, ndërsa e diela do të sjell ulje të temperaturave.
“E premtja dhe e shtuna nuk kanë shumë ndryshim për vlerat termike, pra mbetemi dy ditë, edhe pse janë reshje, relativisht të ngrohta. Do të jetë dita e dielë, e cila do të sjellë një rënie të theksuar të temperaturave. Madje, presim që ditën e dielë maksimumi të jetë rreth vlerës 25 gradë”, tha meterologia Lajda Porja. Sipas meteorologeve në fundjavë era do të fryjë mesatarisht me shpejtësi 50 km/h, duke krijuar në brigjet detare dallgëzim 3 deri në 4 ballë. Klan News
