TIRANE- Ka befasuar ministrja e Kulturës Mirela Kumbaro në Komisionin parlamentar të Mediave, kur tha se gazetari Eni Shehu nuk paska qenë në detyrë kur është sulmuar fizikisht nga drejtori i Teatrit Kombëtar, Hervin Çuli.
Kjo deklaratë e gënjeshtërt e ministres së Kulturës tenton të manipulojë deputetët e këtij komisioni dhe opinionin publik duke marrë në mbrojtje një akt të shëmtuar dhune. Më shumë se kaq, ministrja Kumbaro justifikon dhunën e ushtruar nga drejtuesi i një institucioni publik.
AbcNews deklaron me përgjegjësi të plotë se gazetari është dërguar nga drejtuesit e televizionit për të ndjekur premierën për mediat të shfaqjes ku vetë Çuli është regjisor. Nuk e dimë me çfarë guximi një anëtare e qeverisë gënjen publikisht dhe tenton të deformojë të vërtetën, aq më tepër duke iu drejtuar Kuvendit të Shqipërisë.
Në asnjë rast AbcNews, po ashtu edhe gazetari Eni Shehu, nuk janë kontaktuar nga ministrja Kumbaro, megjithë kërkesat tona për ta informuar për ngjarjen.
Natën e agresionit ndaj gazetarit, drejtori i AbcNews ka kontaktuar me drejtorin për mediat të kryeministrit Rama, të cilit i ka referuar ngjarjen e sapondodhur brenda institucionit të Teatrit Kombëtar. E njëjta gjë është tentuar edhe me ministren Kumbaro, por ajo ka mbyllur çdo shteg komunikimi.
Stafi i AbcNews i kërkon kryeministrit Rama të mbajë qëndrim ndaj minsitres së Kulturës, e cila po bëhet palë në një çështje që po hetohet edhe nga prokuroria, si dhe të shkarkojë drejtorin e Teatrit Kombëtar, Hervin Çuli.
AbcNews, duke falenderuar kolegët dhe shoqatat e gazetarëve për mbështetjen, u bën apel këtyre të fundit për të reaguar përsëri ndaj qëndrimeve të ministres Kumbaro dhe t’i përcjellin këto qëndrime, të paprecedenta të një zyrtari të lartë ndaj medias, në Bruksel.
