Banorët e fshatit Shën Pjetër, të Gjirit të Lalzit mohojnë përfshirjen e tyre në sulmin fizik ndaj biznesmenit amerikan, Fadi Mitri, duke thënë se po i bëjnë “koka turku” për të mbuluar autorët e vërtetë, raporton “Panorama”.
Ata shprehen se nuk i lidh më asgjë që prej pesë vitesh me investitorin e dhunuar në rrugën e Rinasit, që kur përfaqësuesit e kompanisë së tij rrethuan territorin prej rreth 8 mijë metrash katrorë, ku do të ndërtohet resorti me vlerë 180 milionë euro.
Biznesmeni 55-vjeçar, Fadi Mitri, që u dhunua nga persona ende të panjohur, jetonte prej vitesh në Shqipëri dhe kishte synim të investonte në fusha të ndryshme, ku një prej tyre ishte fshati turistik në Gjirin e Lalzit.
Për këtë projekt pati dy protesta nga banorët dhe për këtë arsye, disa prej tyre u shoqëruan nga Policia si të dyshuar për ngjarjen e së shtunës, por u lanë sërish të lirë, pasi nuk u provua lidhja e tyre me sulmin.
PRONA
Sulmi ndaj biznesmenit që përfaqëson kompaninë nga Katari, që do të ndërtojë resortin turistik te Gjiri i Lalzit, dyshohet se ka lidhje pikërisht me këtë investim që do të kryhet. Të paktën kjo është pista kryesore ku po heton Policia e Tiranës, nisur nga ato çka vetë sipërmarrësi i huaj ka deklaruar pas sulmit.
Sipërfaqja e truallit pranë bregdetit ku do të ndërtohet fshati turistik, është rrethuar prej vitit 2011. Bëhet fjalë për një sipërfaqe të konsiderueshme brezi pishash, duke nisur nga një kompleks turistik pranë Postës së Policisë e deri në afërsi të fshatit Shën Pjetër.
Që nga momenti kur është rrethuar kjo sipërfaqe, në këtë territor nuk është zhvilluar asnjë investim, ndërsa ruhet gjatë 24 orëve nga punonjës sigurie. Asnjë prej banorëve nuk është lejuar që të futet brenda apo të shohë se çfarë po ndodh aty.
“Ne nuk futemi që pas protestave të disa viteve më parë në këtë territor. Ai ka mbetur i rrethuar dhe i pazhvilluar prej vitesh. Vetën nëpërmjet bregdetit mund të futesh brenda, por ruhet me roje dhe nuk kemi parë asnjë person. Prandaj protestuam disa vite më parë”, shprehen banorët e Shën Pjetrit.
BANORET
Pasi u rrethua zona në bregdet në vitin 2011, punonjësit e kompanisë nga Katari hasën në kundërshtimin e banorëve të zonës së Shën Pjetrit dhe Gjirit të Lalzit, të cilët e konsideronin të paligjshëm rrethimin e këtij territori.
Banorët pranojnë se e kanë kundërshtuar këtë projekt, por për ngjarjen e së shtunës ata thonë se janë bërë “koka turku”, për të mbuluar autorët e vërtetë të ngjarjes. Sipas tyre, autorët e dhunimit të biznesmenit nuk janë fshatarët e Shën Pjetrit, Gjirit të Lalzit dhe rrethinave, por ata që kanë interesa dhe nuk duan që biznesmeni amerikan të kryejë investimin e parashikuar.
“Ne nuk kemi lidhje fare me këtë ngjarje. Ne nuk e njohim si person. Ne protestuam para disa vitesh, sepse kishim dëshirë që bregdeti t’i ngelte dhe të shfrytëzohej nga banorët e zonës dhe jo nga pronarë të panjohur, të cilët e përfitonin në mënyrë të jashtëligjshme. Madje, hapëm edhe proces gjyqësor disa vite më parë. Por edhe pse kishim të drejtë, nuk arritëm dot të gjenim drejtësi. Ngelëm në këtë fazë. Tani, këtu në Gjirin e Lalzit, ky biznesmeni arab (Fadi Mitri) është më pak i dëmshmi, pasi bregdeti është rrëmbyer dhe privatizuar në mënyrë të paligjshme, duke nxjerrë jashtë loje banorët e zonës nga persona të pushtetshëm. Në këtë rast ne jemi bërë ‘koka turku’. Autorë nuk janë banorët e këtyre zonave, por investitorët e tjerë, të cilëve iu prishën interesat”, u shprehën banorët./Panorama
