Koha relativisht e gjatë nga projektet muzikore nuk e kanë lënë Rovena Dilon jashtë vëmendjes së publikut, përkundrazi. Kohët e fundit emri i saj ka qenë mjaft i lakuar në mediat rozë për shkak të divorcit me bashkëshortin, ish-futbollisti Florian Riza.
Për këtë divorc ajo nuk foli asnjëherë publikisht, por e pranoi në heshtje, derisa pranon se lajmi që qarkulloi disa muaj më parë në media ishte i vërtetë: “Ne jemi të divorcuar që nga tetori i viti 2015. Ka qenë një martesë 7-vjeçare, kërkesa për t’u divorcuar është bërë në mënyrë paqësore nga të dy dhe gjykata e Tiranës e ka parë të arsyeshme dhe të logjikshme dhënien e divorcit. Kjo është e vërteta” – tregon ajo së fundi në një intervistë për Prive.
Por nuk flet në të njëjtën mënyrë për thashethemet e fundit mediatike për lidhjen me partnerin e saj në balet në spektaklin DWTS, Eltionin, për të cilin nuk qenë të pakta daljet publike në pothuaj çdo event artistik dhe dalje publike. E pyetur për këtë lidhje, ajo kthen një përgjigje të prerë: “Për thashetheme unë nuk flas. Unë flas vetëm për të vërtetat e jetës sime…”
Në një kohë kur të luftojë shumë me gjithçka të papritur që i sjell jeta, Rovena ndihet shumë mirë, madje edhe në formë për të riardhur në muzikë pas një pauze të gjatë: “Jam mirë, jam energjike, jam e disponueshme. Sigurisht që jeta të ofron të gjitha llojet e shijeve, edhe speca të kuq që të djegin, por e rëndësishme është që të gjitha këto t’i marrësh si gjëra të bukura dhe gjëra që kalojnë. Asnjë stuhi nuk vazhdon përgjithmonë, asnjë gëzim nuk vazhdon përgjithmonë…”
