Cristiano Ronaldo, nëpërmjet një deklarate të “Gestifute”, përfaqësuesi i kompanisë së Jorge Mendes, ka mohuar me forcë informacionin e botuar nga “Der Spiegel”, sipas të cilit lojtari portugez i Real Madridit thuhet se ka përdhunuar një vajzë të re në vitin 2009. Kjo gjë është publikuar nga media gjermane, e cila i referohet “Football Leaks”. Informacionet që kanë rrjedhur, në të cilat e ka bazuar shkrimin e vet “Der Spiegel”, tregojnë se Ronaldo dhe njerëzit e tij ranë dakord të paguajnë 258,172 euro (375.00 dollarë) që vajza e përdhunuar të mos ankohej dhe tregonte asgjë. Më poshtë po riprodhojmë deklaratën e lëshuar nga “Gestifute”:
“Gazeta “Der Spiegel” publikoi një histori të gjerë në lidhje me një akuzë të pretenduar përdhunimi, që gjasme qenka kryer nga Cristiano Ronaldo në vitin 2009, pra rreth 8 vite më parë. Kjo është një pjesë e gazetarisë “fiction”. Viktima e supozuar refuzon të identifikohet dhe të vërtetojë historinë. I tërë ky komplot është bazuar në dokumenta, të cilat palët i identifikojnë me iniciale, me e-mail të këmbyer mes avokatëve, të cilët nuk kanë lidhje me Cristiano Ronaldon dhe autenticitetin. Flitet për një letër të dyshuar, që i është dërguar viktimës së pretenduar, por që ajo kurrë nuk e ka marrë. Raporti i “Der Spiegel” është i rremë dhe Cristiano Ronaldo do të ndërmarrë veprime ligjore kundër tij me të gjitha burimet në dispozicion. Akuza e përdhunimit është një akuzë e neveritshme dhe e turpshme, që nuk mund të mbetet pa u ndëshkuar “.
Sipas “Der Spiegel”, përdhunimi i supozuar ka ndodhur në SHBA. Më konkretisht, mëngjesin e 13 qershorit 2009, në një hotel luksoz në Las Vegas (Cristiano Ronaldo u prezantua gati një muaj më pas te Real Madridi, më 6 korrik, edhe pse konfirmimi i transferimit nga Manchester United te “Los Blancos” ishte bërë më 11 qershor). Muaj më vonë, më 12 janar 2010, palët nënshkruan një marrëveshje-zgjidhjeje në praninë e një ndërmjetësi në shtetin e Nevadas. Sipas informatave të “Der Spiegel”, ishte portugezi Carlos Osorio de Castro, përgjegjës për çështjet ligjore të Jorge Mendes, përfaqësuesi i CR7, i cili, me inicialet “Mr.D.” nënshkroi dokumentin prej tri faqesh, ku përfshihet edhe viktima, “znj.C”. Sipas “Der Spiegel”, vajza e përdhunuar kishte deklaruar detyrimin për të qëndruar e heshtur mbi këtë histori, të tërhiqte ankesën, të pastronte çdo material elektronik. Sipas gazetës gjermane, vajza e kishte raportuar shkeljen e pretenduar në Departamentin e Policisë Metropolitane të Las Vegas, në të njëjtën ditë, por pa dhënë emrin e lojtarit, të cilin e kishte referuar si “figurë publike” dhe “sportist”. Më në fund, pas marrëveshjes, ajo e ka tërhequr ankesën.
