Legjenda braziliane Roberto Karlos, në një deklaratë të shkurtër për “Tyc Sports”, u shpreh se nëse Brazili do kishte Lionel Mesin në skuadër, mund të kishte fituar së paku njërin nga tre Botërorët e fundit. Mesi, kapiten i Argjentinës, debutoi në kompeticionin madhor në vitin 2006 dhe kjo në Rusi do jetë pjesëmarrja e katërt.
“Pleshti” dhe kombëtarja e tij u mposht dy herë në çerekfinale përpara se të humbiste në finalen e Botërorit të kaluar, që u zhvillua në Brazil katër vite më parë. Ndërkohë, “Seleçao” (kampionë në 2002-in) gjithashtu u eliminua në 1/8-at dy herë, në 2006-n dhe 2020-n, përpara se të “thërrmohej” në 2014-n 7-1 nga Gjermania (në gjysmëfinale), që më pas do shpallej kampione e kompeticionit.
Në atë turne, Nejmar, “hajmalia” e brazilianëve, u dëmtua në fazën çerekfinale ndaj Kolumbisë. Dhe do jetë po “O’Ney”, ai që do mbajë shpresat e një kombi edhe këtë verë, por Karlos beson se vetëm një lojtar në botë mund të bëjë një diferencë më të madhe se sulmuesi i PSG-së… dhe është Mesi, “ikona” e Barcelonës.
