Kryeministri i Maqedonisë së Veriut, Dimitar Kovaçevski, ka dorëzuar dorëheqjen. Lajmi është dhënë nga Kuvendi I RMV.
Më vonë pritet edhe dorëheqja e kryeparlamentarit Talat Xhaferi, i cili të dielën pritet të marrë funksionin e kryeministrit teknik.
Menjëherë pas kësaj do të njoftohet presidenti Pendarovski, i cili të premten, pas zgjedhjes së kryetarit të ri të Kuvendit, do t’ia caktojë mandatin kryeministrit teknik.
VMRO-DPMNE opozitare ka përcaktuar mbrëmë kandidatët për ministra dhe zv.ministra në qeverinë teknike.
Komiteti ekzekutiv i partisë propozon që në Ministrinë e Punëve të Brendshme të ulet Pançe Toshkovski – avokat dhe kryetar i komisionit juridik të VMRO DPMNE-së, ndërsa Gjoko Velkovski, ish-sekretar i përgjithshëm i Qytetit të Shkupit të ulet në Ministrinë për Punë dhe Politike Sociale.
Për zëvendësministrat, VMRO-DPMNE opozitare propozon Stefan Andonovskin në MIOA, Elena Petrovën në financë dhe Cvetan Tripunovskin në bujqësi.
Deputetët e VMRO-DPMNE-së do të marrin pjesë në seancë, por do të abstenojnë nga votimi për qeverinë teknike në seancën e Kuvendit të së dielës.
