Një gazetare e prestigjiozes “ The Washington Post” është pezulluar nga puna pak orë pas vdekjes së basketbollistit amerikan, Kobe Bryant pasi postoi në Twitter një lajm, i cili nxirrte në pah të shkuarën e pahijshme e basketbollistit.
Postimi i saj u komentua nga mijëra ndjekës dhe disa prej tyre madje e kërcënuan edhe me vdekje. Sonmez në shkrimin e saj nxirrte dokumente, përgjigjet e ADN-së dhe gjithçka që lidhej me një histori të vjetër të basketbollistit të ashtuquajtur Black Mamba, ose Mamba e zezë (gjarpri i dytë më helmues në botë, pas kobrës).
Në vitin 2003, Bryant u arrestua pasi u akuzua nga një 19-vjeçare për sulm seksual. Ajo deklaroi asokohe se Kobe e përdhunoi atë në dhomën e një hoteli në Colorado.
Bryant pranoi marrëdhënien seksuale, por mohoi që akti të kishte ndodhur jashtë dëshirës së saj. Në shtator të vitit 2004, çështja u rrëzua nga prokurorët për shkak se e reja nuk pranoi të dëshmonte në gjyq dhe më pas, Bryant kërkoi falje duke thënë:
“Megjithëse besoj se takimi mes nesh ishte me pëlqimin e të dyja palëve, më vjen keq që ajo nuk e konsideron njësoj si unë.”
Akuza sigurisht që dëmtoi rëndë reputacionin e tij, kontratat me McDonald’s dhe Nutella u ndërprenë, shitjet e fanellës së tij ranë ndjeshëm, si dhe ngjarja desh e çoi drejt ndarjes me bashkëshorten, Vanessa.
Shumë vite më vonë Kobe pranoi se Mamba e Zezë ishte një pseudonim që e krijoi për t’u përballur me atë periudhë të errët të jetës së tij, si dhe me gjithë presionin mediatik dhe shtoi se “egërsia” në pseudonim nuk kishte të bënte me kundërshtarët në lojë, por me betejën e tij brenda vetes.
“M’u desh të veçohesha. Ndjeja se kishte kaq shumë gjëra që shfaqeshin menjëherë. Nuk dija ç’të bëja. Më duhej të organizoja gjërat. Kështu që krijova Mambën e Zezë. Unë u shndërrova në një vit nga një person që ishte në krye në lojës dhe kishte gjithçka, në një njeri që s’ja kishte idenë se çfarë duhej të bënte me jetën e tij,” u shpreh ai./Opinion.al
