Vetëm dy ditë para nisjes së vitit të ri shkollor, Ministria e Shëndetësisë dhe Mbrojtjes Sociale, bëri një apel për mësuesit, prindërit, dhe nxënësit.
Në përditësimin e të dhënave, Ministria, kërkoi të respektohen me rigorozitet masat për mbrojtjen ndaj COVID19 me qëllim parandalimin e përhapjes së këtij virusi.
“Normaliteti i ri, i cili na kushtëzon të jemi të kujdeshëm në përditshmëri për ruajtjen e distancimit fizik, mbajtjen e maskave ose barrierave mbrojtëse në ambientet e mbyllura dhe kujdesin e shtuar për higjenën personale.”, u shpreh Ministria.
Ministria iu bëri apel prindërve të kontaktojnë me mjekun e familjes dhe ta sinjalizojnë atë nëse ka diçka që nuk shkon tek fëmija. Po ashtu, t’i masin atyre çdo ditë temperaturën para se të nisen për në shkollë.
Nga ana tjetër, mësuesit, duhet të tregohen vigjilentë ndaj zbatimit të masave të rekomanduara nga ekspertët në ambientet e shkollës dhe për çdo shqetësim, të kontaktojnë koordinatorin e shkollës, i cili sinjalizon menjëherë strukturat shëndetësore.
Ministria sqaron se strukturat e sistemit shëndetësor janë në gatishmëri për t’ju përgjigjur çdo problematike, si dhe për të identifikuar dhe izoluar në kohë çdo rast të dyshuar./Opinion.al
