Ka rinisur sërish në Gjykatën Kushtetuese seanca për shkarkimin e Presidentit Ilir Meta.
E para që parashtroi diskutimet përfundimtare ishte Klotilda Bushka, si përfaqësuese e Kuvendit. Ajo kërkoi që presidenti Meta të shkarkohej pasi ka shkelur rëndë kushtetutën.
Bushka ka thënë ndër të tjera se Meta jashtë kompetencave të tij ka shpërndarë sulme ndaj përfaqësuesve ndërkombëtarë dhe po ashtu ka shkelur parimin e kushtetueshmërisë për ruajtjen e balancave.
“Kuvendi vlerëson se presidenti ka shkelur rëndë Kushtetutën. I kërkojmë Gjykatës Kushtetuese shkarkimin e Ilir Metës. Me anë të këtij vendimi të vendosen standarde që askush të mos shkelë Kushtetutën. Presidenti jashtë kompetencës së tij ka shpërndarë sulme ndaj përfaqësuesve ndërkombëtarë në vendin tonë. Ka shkelur parimin e kushtetutshmërisë për ruajtjen e balancave. Ka shkelur betimin e Kushtetutës për t’i shërbyer interesit të popullit. Në shumë nga daljet e veta publike presidenti ka përdorur një retorikë dhune. Kjo retorikë ka pasur përshkallëzim të fortë deri në përfundim të fushatës. Të gjitha sa përmenda janë shkelje kushtetuese qe përmbajnë shkelje të betimit të presidentit. Asnjë nga veprimet e presidentit nuk parashikohen si kompetencë e tij. Shkeljet e presidentit janë të renda për shkak se cënojnë pozicionin e presidentit, shkelje që lidhen me integritetin që kërkon procesi zgjedhor, që lidhen me sigurinë në vend dhe marrëdheniet me jashtë. Edhe presidenti vetë shpresoj unë, është i vetëdijshëm për këto shkelje”, tha Bushka.
Ndërkohë përfaqësuesit e Presidentit i çuan më herët gjykatës përgjigjet e 72 pyetjeve ku Bledar Dervishaj ka thënë se raporti i Komisionit të Ligjeve nuk ka qenë miratuar kur u përcaktua seanca plenare. Po ashtu ai ka thënë se gabim ka qenë urgjenca se si janë sjellë provat nga Kuvendi, gjë që vë në dyshim vërtetësinë e tyre.
“Nëse do të krahasojmë pikën 20 të urdhrit të kryetarit, me pikën 20 të rendit të ditës, edhe titulli ndryshon. Kjo vë në dyshim të fortë vërtetësinë e provave të sjellë. Gabimi më trashanik është urgjenca sesi është sjellë kjo provë e Kuvendit, e cila nuk është e vërtetë, por ka si qëllim të hedhë poshtë atë çka pretendon presidenti”, është shprehur Dervishaj./Opinion.al
