Kryetari i Bashkisë së Tiranës, Erion Veliaj inspektoi punimet e rindërtimit të ish-godinës së ATSH-së në Bulevardin “Zogu I”. Ai u shpreh se gjatë procesit të rindërtimit godina do të ruajë disa elementë identifikues që arkitekti Maks Velo i kishte përdorur në ndërtesën e vjetër.
“Jam vërtet entuziast për punën që ka bërë skuadra këtu. I vlerësoj jashtë mase, jo vetëm stafin shqiptar, por edhe stafin që vjen nga India. Ka aq shumë kantiere në Tiranë saqë nuk përballohet dot më forcën punëtore të Tiranës dhe gjithmonë e më shumë do të shohim stafe të huaja. Këtu kemi punuar edhe gjatë gushtit, kur shumica e njerëzve shkonin me pushime. Kjo është një zyrë e re, e cila njihej më përpara si ‘pallati i Maks Velos’. Ende s’ka përfunduar, ne po i bëjmë me porosi pllakat që stilizonin dy katet e para të pallatit, ashtu siç i kishte bërë Maksi”, tha Veliaj.
Kryebashkiaku shtoi se godina do të ketë dy kate shtesë, që do të përdoren nga Drejtoria e Transportit, e cila siç theksoi ai, ka bërë revolucion sot në Tiranë, duke u ndalur te transporti elektrik me taksi, korsitë e biçikletave dhe përgatitja për revolucionin më të madh të transportit urban.
“Siç kthyem në identitet ‘Pallatin me Kuba’, i cili njihej si pallati i Ismail Kadaresë dhe i Dritëro Agollit, siç kthyem në identitet kinemanë në Laprakë, kështu do të kthejmë në identitet edhe këtë vepër, e cila ka edhe dy kate shtese, ku do të vendoset drejtoria jonë e Transportit. Drejtoria e Transportit ka bërë një revolucion në Tiranë sepse sot jemi qyteti numër një për transportin elektrik me taksi, jemi qyteti që ka shtuar më shumë korsitë e biçikletave dhe monopatinave, dhe jemi gjithashtu qyteti që po përgatitet për revolucionin më të madh të ecjes së shpejtë me autobus. Ne po bëjmë edhe verifikimin në kohë reale të autobusëve, edhe mënyrën se si do të bëjmë subvencionimin e abonesë për studentët dhe pensionistët. Jemi duke bashkëpunuar me Institutin e Sigurimeve Shoqërore që, për linjat urbane, nga 1 janari, të mbajmë fjalën e dhënë për të lehtësuar, përveç studentëve, edhe pensionistët”, deklaroi Veliaj.
Ai u shpreh se do të shihet mundësia e transferimit të institucioneve të tjera në këtë godinë, në mënyrë që të mos paguajnë qira të panevojshme. Ndërkohë, Veliaj shtoi se shumë shpejt disa institicione financiare do të transferohen në lagjen “5 Maji”.
Sipas Veliajt, kjo praktikë e shpërndarjes së institucioneve ne pika të ndryshme të kryeqytetit, ndihmon në gjallërimin e këtyre zonave në çdo orë të ditës.
“Ajo që kemi provuar është se kur lagjet kanë shfrytëzim të përbashkët, pra edhe punohet, po edhe jetohet, atëherë ajo lagje ka gjithmonë jetë. Statistikat tregojnë se aty ku ka jetë 24 orë ka më pak kriminalitet, komunitetet janë më të afruar me njëri-tjetrin, ka më shumë siguri për fëmijët”, deklaroi Veliaj.
