Dokumentari -Film “Diktatori” , është produkt i një pune dy vjeçare kërkimore, bazuar mbi librin e gazetarit Blendi Fevziu, “Enver Hoxha”.
Filmi ka një gjatësi prej 88 minutash dhe trajton figurën e Enver Hoxhës njërit prej drejtuesve më të lartë të Shqipërisë.
Ai që dominoi për 41 vjet Shqipërinë, ka pasur një jëtë të veshur me mister të madh i cili edhe pas rrëzimit të regjimit komunist vijon ende të jetë i pazbardhur plotësisht. Për filmin është punuar nga stafi i “OPINION” me muaj të tërë në arkiva, janë marrë shumë dëshmi (mes tyre edhe ajo e historianit Kristo Frashërit dhënë në një intervistë për emisionon “Opinion” në vitin 2007-të), janë gjetur materiale filmike të patransmetuara më parë (para se dokumentari të kishte premierën), janë zbardhur dhjetra orë transmetime për të sjellë këtë produkt.
Ky është një film për ata që besojnë se dijnë gjithçka për Enver Hoxhën, por që sa më shumë e shohin aq më shumë do të mësojnë. Ky film vlen edhe për ata që janë rritur në kufijtë e dy kohëve (para dhe pas regjimit), por vlen akoma më shumë për ata që kanë lindur në fund të viteve të komunizmit ose pas tyre dhe që sot përmes këtij filmi do kënë mundësi të kuptojnë jetën e prindërve, gjyshërve apo të parëve të tyre.
Filmi kryesisht ndjek linjën e fëmijërisë, rinisë, shkollimit, e ardhjes në pushtet në krye të partisë komuniste të Enver Hoxhës, konsolidimin e pozitave dhe eleminimin e njerëzve të tij më të afërt.
Sonte në mbrëmje “Opinion” në orën 22:15 minuta do të ritransmetojë filmin “Diktatori”
