Javën e kaluar propozimet e kandidatit republikan për president, Donald Trump mbi çështjen e imigracionit ishin në qendër të debateve në Uashington, ndërsa këtë javë vëmendja po kthehet tek çështja e emaileve të kandidates demokrate Hillary Clinton nga koha kur ajo ishte sekretare shteti.
Dy muaj para ditës së zgjedhjeve, fushata e Clinton është hedhur përsëri në mbrojtje, pasi FBI-ja publikoi shënimet e intervistës tre-orëshe në korrik me kandidaten demokrate për president. FBI më parë ka njoftuar se nuk ka zbuluar prova për shkelje kriminale, por shënimet nga intervista në FBI theksojnë konkluzionet që kanë ndjekur zonjën Klinton për muaj të tërë.
“Ka dëshmi se kishte pakujdesi tepër të madhe në trajtimin informacioneve sekrete,”tha drejtori i FBI-së, James Comey.
Dhjetëra herë, zonja Clinton ka thënë se ajo nuk mbante në mend hollësitë e korrespondencave të saj elektronike kur ishte Sekretare e Shtetit. Gjatë mandatit të saj, ajo ka përdorur një e-mail privat për punët zyrtare. FBI ishte pjesërisht e suksesshme në gjetjen e emailave të fshirë nga serveri i saj privat.
“Ishte një gabim. Unë nuk do ta përsëris atë.”
Sipas shënimeve të FBI-së, zonja Clinton nuk ishte në dijeni se disa emaile që ajo kishte marrë përmbanin informacione sekrete pasi ajo nuk e dinte se shënimi me shkronjën “C” nënkuptonte se informacioni ishte sekret. Fushata Trump menjëherë u hodh në sulm.
Kelleyanne Conway, Menaxhere e fushatës së zotit Trump thotë:
“Një ish-senatore amerikane, ish-zonjë e parë, dhe një sekretare e shtetit duhet të dijë se çfarë nënkupton mbishkrimi “C”. Hillary Clinton është në vështirësi, ajo nuk po pranohet si një kandidate e sinqertë dhe e hapur.”
Kandidati i zonjës Clinton për nënpresident, thotë se shënimet i konfirmojnë përfundimet themelore të FBI-së.
“Këto shënime, të cilat zonja Clinton kërkoi të bëhen publike, tregojnë qartë se pse FBI nuk e pa të nevojshme ngritjen e procedurave penale.”
Republikanët do të vazhdojnë ta shfrytëzojnë këtë çështje.
“Qasja e Qeverisë dhe favoret nuk do të nxirren më në shitje, dhe emailet e rëndësishëm nuk do të fshihen,” thotë zoti Trump
Demokratët u kundër-përgjigjën. Tim Kaine, kandidat demokrat për nënpresident thotë:
“Kandidati Donald Trump nuk do t’i bëjë publike të dhënat mbi taksat e tij pasi ai premtoi se do ta bënte këtë.”
Ndërkohë, sondazhet tregojnë se shumica e amerikanëve i shohin kandidatët Clinton dhe Trump si të pafavorshëm.
/Zëri i Amerikës
