Martin Shkreli, shqiptaro-amerikani i bërë të famshëm për arsyet e gabuara rikthehet sërish në vëmendje. Siç raporton “AP”, zyra Amerikane e Burgjeve ka nisur një hetim për të .
Kjo lëvizje vjen pas një shkrimi nga “Wall Street Journal”, ku theksohej se ai vazhdonte të drejtonte kompaninë farmaceutike edhe pse ishte pas hekurave, përmes një telefoni celular të futur në burg në mënyrë të paligjshme.
Sipas Zyrës së Burgjeve kjo ishte një shkelje tepër e rëndë dhe mund të sjellë marrjen e masave të ashpra ndaj Shkrelit, si izolimi dhe kufizimi i vizitave, përveç se mund të ndiqet edhe penalisht.
Sipas “Wall Street Journal” 35-vjeçari, i lindur në Amerikë nga prindër shqiptarë të emigruar atje, vazhdon të ketë ende ndikim në kompaninë e themeluar prej tij “Pheonixus AG”. Ai është në burg prej 17 muajsh, ndërsa vuan një dënim 7-vjeçar.
Në shtator 2015, Shkreli rriti me 5000% çmimin e ilaçit Daraprim, që përdorej nga të sëmurët me HIV/AIDS duke e çuar çmimin në 750 dollarë për kapsulë. Në dhjetor 2015 ai u procedua penalisht për akuzën e mashtrimit dhe u shpall fajtor në gusht 2017. / Opinion.al
