Organizata Botërore e Shëndetësisë (OBSH) deklaroi se po shqyrton raportet e disa pacientëve me COVID-19, të cilët në testin e dytë dolën pozitivë edhe pse më parë kishin rezultuar si negativë.
Ky njoftim vjen pasi zyrtarët e Koresë së Jugut raportuan të premten se 91 pacientë që mendoheshin se ishin shëruar nga COVID-19 kishin rezultuar përsëri pozitivë në testet e tyre.
Në pyetjen e Reuters-it lidhur me këtë çështje, Organizata Botërore e Shëndetësisë u shpreh se “janë të vetëdijshëm për këto raporte” dhe po i studiojnë ato.
“Rastet po i shqyrtojmë me ekspertët tanë klinikë dhe po punojmë shumë për të marrë më shumë informacione për ato raste individuale. Është e rëndësishme që kur grumbullohen mostrat e testimit nga pacientët e dyshuar, të ndiqen procedurat ashtu siç duhet”, thotë OBSH-ja.
Sipas udhëzimeve të OBSH-së, një pacient mund të lirohet nga spitali pas dy rezultateve të njëpasnjëshme negative me distancë kohore të testimit të paktën 24 orë./Opinion.al
