Deri në këto çaste, veçse në rast të një mrekullie, shumë emra të njohur të së djathtës dhe veçanërisht të Partisë Demokratike, rrezikojnë të mbeten jashtë Kuvendit të ri, kjo për shkak të rezultatit të dobët që po regjistron aktualisht PD, me vetëm 43 mandate të siguruara.
I katërti në listën e qarkut të Lezhës, poeti, publicisti dhe politikani Preç Zogaj me shumë gjasa nuk do jetë pjesë e legjislaturës së XIV-të. Sipas KQZ-së, aktualisht PD në këtë qark ka siguruar tre mandate.
Një tjetër emër i njohur i së djathtës, është edhe emri i kryetarit të PAA-së, Agron Duka, i renditur i pesti në listën e Partisë Demokratike në qarkun e Durrësit, rrezikon pjesëmarrjen në Kuvendin e ri. Referuar të dhënave paraprake, PD rezulton të ketë derimë tani katër mandate.
Projeksioni në Qarkun e Shkodrës, e përjashton momentalisht edhe Nard Ndokën e PDK-së, të renditur të pestin në listën e PD-së e kjo për shkak se momentalisht demokratët kanë siguruar në këtë qark vetëm 4 mandate.
Në Qarkun e Vlorës, fitorja e mandatit të deputetit duket e vështirë për Sekretarin Organizativ të PD-së, Arben Ristanin i renditur i katërti në listë pas Vangjel Dules së PBDNJ-së që duket se e ka siguruar vendin në Kuvendin e ardhshëm.
