Albatros Rexhaj ka publikuar në rrjetin social “Facebook”, një hartë në të cilën është projektuar parashikimi se cilat zona të bregdetit shqiptar do të gllabërohen nga deti deri në vitin 2100.
Sipas trendit aktual të ngritjes së nivelit të detit, qytetet e Vlorës, Durrësit, pastaj zona e Divjakës dhe e Fierit, Gjiri i Lalzit, Shëngjini dhe Velipoja rrezikojnë të zhduken nga harta e Shqipërisë.
Më tej, Rexha shkruan se një elitë serioze e udhëheqjes politike do të merrej me këtë kërcënim por ironizon ai “udhëheqësit politikë duhet të mendojnë për vilat e tyre milionëshe që me aq shumë djersë i kanë ndërtuar në bregdet”.
Postimi i plotë
Në këtë hartë është i projektuar parashikimi që cilat zona të bregdetit shqiptar do të gllabërohen nga deti, deri në vitin 2100. Kjo llogari është bërë sipas trendit aktual të ngritjes së nivelit të detit, si pasojë e ngrohjes globale. Siç shihet qytetet e Vlorës, Durrësit, pastaj zona e Divjakës dhe e Fierit, Gjiri i Lalzit, Shëngjini dhe Velipoja rrezikojnë të zhduken nga harta. Kjo hartë ma përkujtoi parashikimin e Ben Blushit te libri i tij “Hëna e Shqipërisë”.
Sigurisht që pak nga ne, do të jenë gjallë për të parë këtë fuqi shkatërruese të natyrës, por gjithsesi një elitë serioze e udhëheqjes politike që nga tani do të merrej me këtë kërcënim për brezat që do të vijnë.
Është vit zgjedhor, por natyrisht ambienti dhe klima nuk është një temë mjaftueshëm serioze. Por, në mos për asgjë tjetër, duhet të mendojnë për vilat e tyre milionëshe që me aq shumë djersë i kanë ndërtuar në bregdet.
