Grupi BALFIN është vlerësuar nga revista ndërkombëtare “Global Banking & Finance Review”, duke e cilësuar si organizatën me praktikat më të mira të përgjegjshmërisë sociale në Evropën juglindore për vitin 2021. Revista rendit në mënyrë të përvitshme, që prej 2011, kompanitë që operojnë në botën e investimeve dhe financës për arritjet e tyre në aspekte të ndryshme të biznesit.
Një organizatë me aktivitetin e larmishëm të Grupit BALFIN dhe me përvojën e grumbulluar ndër vite, natyrshëm ka potencialin të shërbejë si shembull edhe në mënyrën si bashkëvepron me komunitetin. Numri i pjesëtarëve të komunitetit që kanë pasur kontakt me projektet sociale dhe fushat e veprimit janë dy tregues që e konfirmojnë këtë ide. Sipas publikimeve në mediat sociale të vetë këtij grupi, vetëm në vitin 2021 thuajse 15.000 persona kanë qenë përfitues direkt ose indirekt të projekteve sociale që kanë zbatuar kompanitë e tij, ndërsa drejtimet e angazhimit social të tyre krijojnë mundësinë për ndryshim real në shoqëri.
Burimet zyrtare nga ky grup deklarojnë se kontribut të konsiderueshëm japin kompanitë e këtij grupi në edukim, duke filluar me programin B4Students i cili ndihmon studentët në rrugëtimin akademik dhe profesional. Madje Presidenti i Grupit BALFIN, Samir Mane, shihet vazhdimisht duke zhvilluar takime me pedagogë dhe studentë, dhe duke vendosur ura bashkëpunimi mes universitetit dhe botës së biznesit. Gjithashtu produkte të ndryshme didaktike, pajisje teknologjike dhe rinovim të mjediseve mësimore janë mundësuar ndër vite si projekte sociale të Grupit BALFIN.
Bashkëpunimet e kompanive me një numër shoqatash që kujdesen për shëndetin dhe mirëqenien e kategorive të caktuara të njerëzve kanë rezultuar në partneritete afatgjata, me kontribut financiar dhe produkte të nevojshme, si edhe me punësimin e personave me aftësi të kufizuara. Në publikimet mediatike të kompanive vihet re Fshati SOS me aktivitet në Shqipëri dhe Maqedoninë e Veriut si bashkëpunëtor i stabilizuar.
Zbutja e varfërisë ka qenë përherë e lidhur me sektorët ku veprojnë disa kompani të Grupit BALFIN, si shitjet me pakicë, duke bërë që sasi të mëdha ushqimi, veshjesh apo produktesh të përditshme të shkojnë për familjet në nevojë në të gjithë vendin. Shpesh në këtë angazhim kompanive u janë bashkuar edhe klientët, për të ndihmuar personat në vështirësi ekonomike.
Riciklimi i letrës që gjenerohet nga qendrat tregtare kryeson përpjekjet Grupit BALFIN për mbrojtjen e mjedisit dhe ruajtjen e burimeve natyrore. Drejtuesit e dy qendrave tregtare në Shqipër që zotërohen nga Grupi BALFIN kanë pohuar riciklimin e 315 ton letër vetëm gjatë vitit të kaluar.
Ky çmim përkon edhe me rezultatet e një studim të Universitetit të Tiranës që e nxjerr Grupin BALFIN dhe Presidentin e këtij Grupi Samir Mane si më të vlerësuarit për aktivitetin e tyre social në ndihmë të shtresave në nevojë.
