Një raport i fundit nga Instituti CAF (Charity Aid Foundation), ka vlerësuar bujarinë e 140 shteteve në mbarë rruzullin, ku midis tyre është marrë në konsideratë edhe zemërgjerësia e shqiptarëve për të dhuruar.
Nëse të gjithë mendojnë se shqiptarët janë bujarë, në fakt raporti na nxjerr ndër popujt me kurrnacë në Evropë.
Sipas studimit vetëm 26 për qind e shqiptarëve e fusin dorën në xhep për të dhënë diçka nga vetja e tyre.
Madje në dallim nga raporti i vitit 2017, Shqipëria ka humbur 17 shkallë në raportin e bujarisë.
Vendi më bujar në Ballkan është Kosova që mban vendin e 66, më tej Bosnje Hercegovina në vendin e 90, ndërsa më kurnacë se Shqipëria janë Mali i Zi (116) dhe Serbia (129)
Në indeksin e të dhënave raporti ka përfshirë, të ndihmuarit të huajve, dhurimin e parave dhe kohën e punës vullnetare.
Sipas raportit, 42 për qind e shqiptarëve u ofrohen të huajve kur ata kanë nevojë për ndihmë, duke u renditur të 108-tët në botë.
26 për qind e shqiptarëve kanë dhuruar para vitin e shkuar, duke u renditur në vendin e 64 në botë. Ndërsa sa i përket kohës për vullnetarizëm vetëm 7 për qind e shqiptarëve kanë dhuruar kohën e tyre për bamirësi ose ndonjë kauzë të ngjashme, duke u konsideruar kështu në 10-tëshen e fundit në botë për këtë indikatorë, përkatësisht në vendin e 134.
Ndërsa përsa i përket vendit më bujar, ai mbahet për herë të parë nga Indonezia, duke zbritur nga froni Mianmarin.
