Rektori i Univeristetit të Tiranës, Mynyr Koni firmosi sot vendimin për shkarkimin nga detyra të pedagoges Majlinda Keta e cila ishte gjithashtu kryetare e Komisionit Institucional të Zgjedhjeve në Universitetin e Tiranës.
Në një reagim të sajin pedagogia sqaron se vendimi i rektorit të UT është i pavlefshëm dhe nuk sjell asnjë pasojë juridike.
“Rektori i UT nuk mund të shkarkojë një institucion duke shkarkuar anëtarët e tij që nuk varen, por në të kundërt është i pavarur dhe që ka detyrimin ligjor për të zhvilluar zgjedhjet në UT si institucion.
Sipas ligjit për Arsimin e Lartë neni 68, pika 2 zgjidhja e menjëhershme e kontratës së punës nuk është kompetencë ekskluzive e Rektorit, por është kopetencë e Senatit Akademik i cili nëpërmjet kërkesës së Drejtuesit të njësisë bazë, ngre një komision Ad hoc, dhe vetëm atëherë kur ky komision propozon shkarkimin e personelit, Rektori zgjidh marrëdhënien e punës me UT”, shkruan Keta në reagimin e saj.
Sipas pedagoges ky akt i rektorit Koni ka cënuar imazhin por edhe sistemin demokratik të Arsimit të Lartë në Shqipëri.
“Me këtë akt të paprecedent të një Rektori të një IAL Publike, por jo të tillë për Zotin Koni, ai i ka bërë një dëm të rëndë Arsimit të Lartë dhe imazhit të tij dhe ky veprim i tij, përveçse është i dënueshëm administrativisht, përbën në mënyrë flagrante shpërdorim detyre të funksionarit publik, me pasoja të rënda për institucionin dhe ne personalisht, të parashikuar nga neni 248 të Kodit Penal, si dhe ka kryer vepër penale që prekin zgjedhjet e lira në një sistem demokratik, duke kanosur me ndërprerjen e marrëdhënieve të punës si anëtar i Komisionit të autorizuar nga ligji per zgjedhjet në UT, parashikuar nga neni 325 të Kodit Penal”, përfundon ajo duke paralajmëruar kështu veprime ligjore nga ana e saj.
Rektori Mynyr Koni kishte argumentuar në vendimin për shkarkimin e Ketës se ajo kishte shkelur një sërë urdhash të Ministrisë së Arsimit lidhur me situatës COVID dhe kishte firmosur nisjen e procesit të zgjedhjeve në për rektorin dhe senatin në Univeristetin e Tiranës në kundërshtim me ligjin sipas tij. /Opinion.al
