Trajneri i Kombëtares, Edi Reja është shprehur optimist për ndeshjen e Shqipërisë me Francën duke thënë se ekipi ynë i ka cilësitë për ti vënë në vështirësi kampionët e botës.
“E dimë se ku mund të në godasë Franca, ku mund të na vërë në vështirësi. Por ne kemi mënyrën tonë të lojës dhe e dimë se ku mund ta vendosim edhe ne në vështirësi kundërshtarin. I kemi cilësitë për të vënë në vështirësi edhe Francën”, tha Reja.
Reja pranoi se mund të kishte patur rezultate më të mira nëse do të kishte patur më shumë kohë në krye të pankinë së kuq e zinjve.
“Unë kam punuar atje kur më kanë kërkuar. Mund të kishim marrë rezultate më të mira nëse do të kisha pasur më shumë kohë në dispozicion”, tha ai.
Trajneri Reja tha se lojtarët e dëmtuar, si Cikalleshi dhe Xhaka, i kufizojnë mundësitë por kjo sipas tij nuk duhet të shërbejë si justifikim.
“E dimë që do të ndeshemi me Francën, kampione e botës, por jo gjithmonë fiton më i forti. Ne duhet të përdorim zemrën, por edhe mendjen, sepse ndaj kampionëve duhet të tregohemi të zgjuar”, deklaroi Reja. /Opinion.al
