Pasi Komisioni i Ankimimeve dhe Sanksioneve refuzoi të shqyrtonte çështjen e regjistrimit të PD për zgjedhjet e 14 majit, ka reaguar përfaqësuesi ligjor i “Grupimit Alibeaj”, Indrit Sefa.
Për mediat, ai u shpreh se KAS konfirmoi ankimimin e tyre se Komisioneri është jashtë afatit ligjor për të marrë një vendim përfundimtar në lidhje me kërkesën e PD për t’u regjistruar si subjekt zgjedhor.
Sipas tij, komisioneri ka bërë shpërdorim detyre dhe se mban qëndrime politike.
“Komisionieri nuk po zbaton procedurat ligjore. Këto afate janë përcaktuar qartë, i bëj thirrje komisionerit që në një kohë sa më të shkurtër që të marrë përsipër kërkesat e PD-së. Çdo moment që kalon është një shkelje e të drejtave ligjore. I bëj thirrje të mos vonojë, të regjistrojë PD si subjekt ligjor. Të merren masa të menjëhershme. Dokumentacioni jonë është i plotë, interpretimet janë personale”, tha Sefa.
