Drejtori i Përgjithshëm i Kadastrës, Artan Lame u bëri thirrje qytetarëve gjatë premtes që duke filluar nga dita e hënë të dorëzojnë dokumentacionin për të regjistruar banesat apo trojet e tyre.
Ai tha se janë 12 deri në 13 mijë banesa të paregjistruara, ku rekordin e mban Saranda me rreth 3500 troje me probleme.
“Me vendimin e qeverisë vitin e shkuar vumë në rrugën e zgjidhjes ndërtimet përpara vitit ‘91 kur bashkitë edhe pas këtij viti kanë vijuar në mënyrë masive të ndajnë truaj banimi për nevoja të tyre. Këto troje në shumicën e tyre janë dhënë pa procedura të rregullt, me procedura të dhëna përgjysmë dhe të ngelura varur dhe me proceduara të falsifikuara apo edhe pa asnjë procedure. Me këto dokumente qytetarët kanë vijuar ndërtimin dhe në fund janë gjendur përpara situatës kur nuk kanë mundur të regjistrojnë si të ligjshme banesat e tyre për shkak të dokumentacionit të tyre. Kalvari i banorëve për të regjistruar banesa të tyre nuk ka mbaruar asnjëherë. Sot në të gjithë vendin janë 12-13 mijë banesa dhe troje në këtë situatë absurde, ku rekordin e mban Saranda me rreth 3500 troje të dhëna në këtë mënyrë. Të tilla troje ka me shumicë edhe në Gjirokastër, Përmet, Kolonjë, Tepelenë, Berat, Fier, Elbasan, Lezhë, Kukës, Shkodër etj”, theksoi Lame.
Sipas tij ky problem me reformën e re është në rrugën e zgjidhjes. Lame ka shpjeguar dhe dokumentet që duhen për këtë proces.
“Qytetarët që e vuajnë këtë situatë duhet të fillojnë të grumbullojnë dokumentacionin që kanë për aktin e dhënies së truallit, faturën e pagesës së truallit, qoftë edhe faturë të pjesshme, lejen e ndërtimit që kanë pasur në një akt që kanë pasur me bashkinë apo këshillat bashkiakë. Pas kësaj duhet të paraqesin kërkesë pranë Zyrave Vendore të Kadastrës për regjistrimin e truallit dhe të objektit përkatës. Ftoj qytetarët që në këtë proces të përfshijnë dhe avokatë, zyrat e avokatëve të cilët duke qenë të përgatitur janë në gjendje t’i ndihmojnë shumë në përgatitjen e dokumenteve përkatës. Jo në shumë raste do lehtësojë dhe punën tonë në lehtësimin e këtyre praktikave”, tha Lame./ Opinion.al
