Avokati i ish-ministrit të Shëndetësisë, Ilir Beqaj, ka bërë me dije se pasi kanë refuzuar të paguajnë faturën e SPAK për të marrë kopje të akteve të dosjes së klientit të tij, do të qëndrojnë në Prokurorinë e Posaçme për të lexuar të gjithë dosjen.
Në një deklaratë për media avokati i tij tha se aktualisht janë tek fashikulli numër 2 dhe se do të lexojnë sa të munden.
“Na u dha 24 orë kohë për të shqyrtuar 700 fashikuj të dosjes. Deri tani jemi në fashikullin numër dy.
Pasi lexuam vendimin për komunikimin e akuzës kërkuam kopjen e akteve sic na e njeh të drejtën ligji. 10 mln lekë vetëm për materiale në PDF.
Është qesharake t’i kërkosh një pensionisti si Petro Mersini të paguajë aq para. Rapaj dhe Rjepaj janë në burg dhe atje as nuk lejohet laptopi.
Ironia është që me të njëjtin prokuror, me të njëjtin gjyqtar, çështje të tjera nuk kanë paguar. Do të qëndrojmë deri sa të na lejojnë SPAK. Dola për të pirë një kafe dhe do kthehem brenda”, ka thënë avokati i Beqajt.
Që prej orës 9:00, prokurorët i kanë vënë në dispozicion dosjen, në një dhomë të posaçme ku qëndrojnë avokatët, për t’u njohur me të.
