Kreu i Lëvizjes Vetëvendosje, Albin Kurti, vetëm pak orë më parë refuzoi ftesën e dytë të presidentit Hashim Thaçi për ta mandatuar për krijimin e institucioneve të reja.
Ftesën e parë Thaçi ia kishte dërguar për në orën 13:30, ndërkohë pas arsyetimit të Kurtit se gjendet jashtë Prishtinës, Thaçi i ka dërguar edhe ftesën e dytë për në orën 20:00, e cila gjithashtu është refuzuar nga Kurti.
Ndërkohë, kreu i Lëvizjes Vetëvendosjes po merr pjesë në pritjen e fundvitit që partia e tij e ka organizuar në një prej restoranteve në Prishtinë.
Kurti ka folur për mediat në lidhje me refuzimin e tij ndaj ftesave të Thaçit, duke thënë se; “Kam marrë sot dy ftesa, por agjenda e krerëve të shtetit është shumë e ngjeshur. Prandaj nuk mund të takohemi ashtu, përveç kur ka ndonjë fatkeqësi ose ndonjë urgjencë tjetër”, ka thënë Kurti.
Gjithashtu, ai ka theksuar se do të takoj presidentin e Kosovës, por paraprakisht po shqyrton dhe nenet e përmedura në ftesat e bëra nga ana e Thaçit.
“Kam qenë në Shkup dhe unë nuk e kam agjendën sot për sot”. /Opinion.al
