“I vetmi person që dëshiron probleme në kufi është presidenti serb, Aleksandër Vuçiç”. Kështu është shprehur kryeministri i Kosovës Albin Kurti, në mbledhjen e qeverisë.
Më tej Kurti tha se le t’i heqim targat e përkohshme edhe Serbia dhe Kosova duke theksuar që nuk është në interesin e Serbisë që të refuzojë dialogun dhe bisedimet siç po bëjnë aktualisht.
“Vendimi për targat është i drejtë dhe garanton të drejtën e lëvizjes së lirë, përfshirë edhe qytetarëve serbë. Pengesat janë duke u bërë me disa kamionë pronë komunale dhe kjo është keqpërdorim i aseteve publike. Ftoj grupin e organizuar të qytetarëve serbë sepse ata kanë bllokuar veten e tyre dhe lëvizjen. Për incidente s’kanë interes as qytetarët e as shteti ynë, s’kanë interes as serbët e Kosovës e as Serbia. Duket se interes ka vetëm një individ, presidenti i Serbisë. Ne jemi për dialog. Edhe oferta jone publike është tejet praktike, le t’i heqim targat e përkohshme edhe Serbia dhe Kosova. Besoj që nuk është në interesin e Serbisë që të refuzojë dialogun dhe bisedimet siç po bëjnë aktualisht. Brukseli është vendi ku duhet të zhvillohen bisedimet dhe ne jemi të gatshëm e të hapur për të biseduar.”
Situata në kufi për të tretën ditë radhazi vazhdon të jetë e tensionuar dhe qytetarët serbë po protestojnë./Opinion.al
