Kryeministri i Britanisë, Boris Johnson ka kërkuar zgjedhje të parakohshme pasi Parlamenti votoi kundër tij në propozimin e tij të parë ligjor si kryeministër.
Deputetët votuan 328 me 301 për të marrë në dorë agjendën e Brexit duke shmangur kështu një dalje pa marrëveshje nga BE. Megjithatë shumica në këtë votim nuk mund të krijohej nëse 21 deputetë nga Partia Konservatore nuk do të votonin kundër qeverisë së tyre.
“Nuk duhet të ketë dyshime për pasojat e këtij votimi”, tha Johnson mbrëmjen e së martës. “Kjo do të thotë se parlamenti është në prag të prishjes së një marrëveshjeje që ne mund të arrijmë në Bruksel sepse ky ligj ka për ti dhënë kontrollin e negociatave BE-së dhe kjo do të thotë më shumë vonesa dhe më shumë çoroditje…Unë nuk kërkoj zgjedhje por nëse deputetët votojnë ndalimin e negociatave për një shtyrje tjetër të pakuptimtë të afatit të Brexit atëherë kjo ka vetëm një mënyrë për tu zgjidhur”, shtoi ai.
Kryeministri do të kërkojë të mërkurën nga parlamenti për të aprovuar zgjedhjet e parakohshme në 15 tetor në mënyrë që votuesit ti japin zgjidhje çështjes së marrëdhënieve mes BE dhe Britanisë. Megjithatë për të marrë këtë aprovim, Johnson-it i duhen dy të tretat e votave që domethënë edhe votat e partisë Laburiste. Kreu i saj, Jeremy Corbyn tha se nëqoftëse nuk kalon ligji që ndalon një Brexit pa marrëveshje atëherë partia e tij nuk do të aprovojë zgjedhjet.
Downing Street tha se 21 deputetët konservatorë që u ‘rebeluan’ në votimin e së martës do të përjashtohen nga partia, dhe do të thotë se ata nuk mund kandidojnë më si konservatorë në zgjedhje.
Rebelët përfshijnë disa konservatorë të moshuar, përfshirë ish-kancelarin Ken Clarke – një deputet veteran me gati pesë dekada – i cili tha se ai nuk e njeh më partinë e tij.
Gjithashtu ndër rebelët e tjerë të jetuar janë edhe Philip Hammond i cili – deri më 24 korrik – shërbeu si kancelar, ish sekretari i drejtësisë David Gauke, nipi i Winston Churchill Sir Nicholas Soames dhe Rory Stewart, i cili së fundmi qëndroi kundër Boris Johnson për të qenë drejtuesi i partisë. /Opinion,al
