Ish-Kryeministri i Shqipërisë, Pandeli Majko, është politikani i parë që ka reaguar ndaj kërcënimeve të Presidentit të Serbisë, Aleksander Vuçiç se do të dërgojë ushtrinë në Kosovë.
Majko ka thënë se deklaratat si të Nilolicit më herët kanë shkaktuar gjakderdhje në Ballkan dhe liderët serbë kanë përfunduar në Hagë duke u gjykuar për krime lufte. Veç kësaj, Majko ka treguar se në politikë deklaratat dhe veprimet janë gjëra krejtësisht të ndryshme. Prandaj, ka propozuar, dialog ndërmjet Kosovës dhe Serbisë si opsion i zgjidhjeve europiane.
DEKLARATA E PLOTË E MAJKOS
Serbia nëpërmjet deklarimeve të presidentit të saj ka deklaruar se “do të dërgojë ushtrinë” në Kosovë.
Një deklarim i tillë ka kohë që nuk dëgjohet nga politika serbe. Kjo mënyrë sjellje pati pasojë gjakosjen e rajonit dhe dërgoi në Gjykatën e Hagës lidershipin e Beogradit.
Të thuash dhe të bësh, janë dy gjëra të ndryshme në politikë. Historia ja ka dhënë serbëve dhe shqiptarëve mësimet e saj.
Dialogu është opsion i zgjidhjeve europiane dhe ka raport me të vërtetën e paqes që duan kombet në rajon. Kjo e vërtetë fton gjakftohtësinë të kuptojë. Politikan nuk të bën lufta. E kundërta është e vërtetë.
Trim nuk të bëjnë deklaratat e luftes. Kjo është po aq e vërtetë sa fakti se një tren nuk bëhet kishë me piktura fetare.
Të kuptuarit e luftës është akt dhe jo deklaratë. Kjo do pak mencuri në të kuptuar, e cila kombit serb, si rregull, nuk i ka munguar.
Për më tepër, shqiptarët kanë një të metë kombëtare. Ata janë më të aftë në luftë se sa në paqe. Sigurisht.
