Kryeministri Edi Rama i është përgjigjur deklaratës së Ministrisë së Jashtme Bullgare, e cila e konsideroi reagimin e tij në forumin e Bledit në Slloveni si antibullgare. Në një status në Twitter ai shkruan:
“Nëse Ministria e Jashtme e Bullgarisë nuk kishte asgjë më të rëndësishme sot sesa një deklaratë publike për diçka që thashë në një panel të Forumit Strategjik të Bled, nuk mund ta marr si një kompliment të madh për forumin dhe panelin, duke përfshirë edhe veten time! Por seriozisht, kjo është e pamerituar.
Ndoshta dikush duhet të ndihmojë miqtë tanë të Ministrisë së Jashtme bullgare me përkthimin e përgjigjes sime në Bled se si Bullgaria bllokoi hapjen e bisedimeve të anëtarësimit të Shqipërisë në BE kur më në fund të gjithë të tjerët ranë dakord pas 8 vitesh të gjata! Thjesht përsërita të njëjtat gjëra që thashë në qershor”.
Ministria e Jashtme Bullgare më herët tha se kreu i qeverisë shqiptare ka bërë deklarata të papranueshme dhe të pahijshme për një kryeministër, vendi i të cilit është kandidat për anëtarësim në BE.
Kjo deklaratë erdhi pasi kryeministri Edi Rama deklaroi në Forumin e Bledit të mbajtur më datë 29-30 gusht të këtij viti në Slloveni se Bullgaria bllokoi fillimin e negociatave të Shqipërisë me BE për 8 vjet, për shkak të vetos ndaj Maqedonisë së Veriut./Opinion.al
