Niveli i përhapjes së Covid-19 vijon të rritet në shtetet europiane dhe shqetësimi i autoriteteve për një valë të dytë, i ka detyruar qeveritë europiane të marrin masa të reja kufizuese për të luftuar.
Shtetet në të gjithë Evropën u kanë kujtuar njerëzve nevojën për vigjilencë mes rasteve në rritje ndërsa sezoni i pushimeve verore vazhdon.
Belgjika vendosi rregulla të reja këtë javë për grumbullimet sociale të njerëzve, duke lejuar takimin e jo më shumë se 5 personave jashtë familjes, gjithashtu është reduktuar numri i personave që mund të mblidhen në ambiente të hapura e të mbyllura. Aktualisht, Belgjika ka një ndër nivelet më të larta të përhapjes së Covid-19 në Europë.
Franca ka urdhëruar mbylljen e plazheve në Quiberon gjatë natës, pas shfaqjes së një vatre të re përhapje në një resort.
Gjermania zyrtarizoi masën e testeve të detyrueshme për koronavirus për këdo që udhëton në shtete me rrezikshmëri të lartë. Në këtë vend, nuk ka shifra të larta, por autoritetet kërkojnë të parandalojnë një valë të dytë.
Ndërkohë, teksa autoritetet po përpiqen të shpëtojnë industrinë e turizmit, Spanja, po përjeton një rritje shqetësuese të shifrave ditore.
Por autoritetet insistojnë se pandemia është nën kontroll dhe kritikojnë Mbretërinë e Bashkuar për vendosjen e Spanjës në listën e vendeve me rrezikshmëri të lartë. Kjo do të thotë se turistët apo shtetasit që shkojnë në këtë vend e kthehen në Britani do të duhet të vetëkarantinohen për 14 ditë./Opinion.al
