Rastet e shtuara të akuzave për pedofili ndaj priftërinjve, kanë sjellë edhe reagimin e Joseph Ratzinger, Papës që u largua nga kjo detyrë më 28 shkurt 2013. Ai ka vendosur ta publikojë shkrimin e tij prej 18 faqesh në gazetën gjermane “Klerusblatt” pas bisedimeve që ka pasur me Sekretarin e Shtetit të Vatikanit Pietro Parolin dhe vetë Papa Françeskun.
Benedikti i XVI flet për një kolaps moral, që ka ardhur si pasojë e revolucionit kulturor në Europë në vitin 1968. “Gjithmonë kam pyetur veten se si vallë në këtë gjendje, të rinjtë mund të shkojnë te prifti dhe të pranojnë të gjitha pasojat. Bjerrja e vokacionit të besimit në ato vite dhe numri i madh i dorëheqjeve nga Kisha, ishin pasoja të atij revolucioni”, shkruan ndër të tjera Benedikti XVI.
Ai shkruan se bëhet fjalë për një proces që vazhdoi në vitet ’70-’80, kur pedofilia u bë një çështje e nxehtë. Sipas Benediktit XVI, Selia e Shenjtë ishte në dijeni të këtyre problemeve, edhe pse jo për të gjitha detajet.
Në shkrimin e tij të gjatë, Benedikti XVI thotë se Papa Gjon Pali II punoi shumë për t’i vënë një argjinaturë këtij problemi, ndërsa falenderon edhe pasardhësin e tij, Papa Françeskun për gjithçka që po bën në krye të Kishës Katolike./Opinion.al
