Një person në Filipine ka humbur jetën për shkak të koronavirusit, duke u bërë kështu viktima e parë e epidemisë jashtë Kinëës.
Ai ishte një burrë 44-vjeçar kinez nga Wuhan, ku është dhe epiqendra e virusit.
Sipas Organizatës Botërore të Shëndetit ai ishte infektuar para se të mbërrinte në Filipine. Burri kishte udhëtuar në Filipine nga Wuhan, përmes Hong Kong, me një grua 38-vjeçare, e cila gjithashtu rezultoi pozitive në testin për virusin.
Zyrtarët thanë se ai ishte pranuar në një spital në kryeqytet, Manila, dhe më pas zhvilloi pneumoni të rëndë.
Përfaqësuesi i OBSH-së në Filipine, i nxiti njerëzit të qëndrojnë të qetë pasi siç tha ai “kjo është vdekja e parë e raportuar jashtë Kinës. Sidoqoftë, duhet të kemi parasysh që ky nuk është një rast i infektuar në vend. Ky pacient ka ardhur nga epiqendra e epidemisë ”.
Ndrësa në Kine raportohen se më shumë se 300 persona kanë vdekur shumica e të cilëve janë në provincën Hubei. Rreth 14 mijë persona numërohen të infektuar me virusin vdekjeprurës.
Shtetet e Bashkuara të Amerikës dhe Australia kanë një rritje të numrit të personave të prekur ndërsa është rritur edhe numri i vendeve ku ka persona të prekur. Të gjithë personat që po vijnë nga Kina po iu nënshtrohen një analizave ndërsa atë prekurit po mbahen në dhoma të izoluara. /Opinion.al
