Delegacioni i Bashkimit Europian ka përshëndetur miratimin e aktit normativ “anti-KÇK” të qeverisë duke thënë se ai është tregues i vullnetit për luftën ndaj krimit të organizuar dhe terrorizmit.
““Ndiqni paratë” ka vërtetuar se është një mënyrë shumë efektive për të luftuar konkretisht organizatat kriminale. Ligji special i miratuar nga Qeveria e Shqipërisë që prezanton masa të reja parandaluese për forcimin e luftës kundër krimit të organizuar dhe terrorizmit shkon në këtë drejtim dhe tregon vullnetin politik për adresimin e kësaj çështjeje.
Qeveria miratoi të enjten një paketë masash të paralajmëruar nga kryeministri Rama dhe të ‘pagëzuar’ prej tij me emrin “anti-KÇK”. Akti normativ i qeverisë parashikon krijimin e strukturave të reja në Policinë e Shtetit dhe forcim të kompetencave të saj në hetimin e rasteve të korrupsionit, organizatave kriminale dhe terrorizmit.
Megjithatë në reagimin në Twitter të BE, theksohet se masat e reja të parashikuara nga ky akt duhet të zbatohen në përputhje me të drejtat e njeriut dhe të ndiqen nga institucionet e krijuara nga reforma në drejtësi.
“Ne do të ndjekim nga afër zbatimin konkret të aktit normativ. Është me shumë rëndësi që masat e reja legjislative të zbatohen me respekt të plotë të të drejtave themelore të të pandehurve dhe në përputhje me parimet e shtetit të së drejtës. Është gjithashtu e rëndësishme që këto masa të reja të ndiqen përmes institucioneve të krijuara nga reforma në drejtësi, në veçanti SPAK. Ne vazhdojmë të inkurajojmë qeverinë e Shqipërisë të rrisë më tej përpjekjet e saj për zbatimin e plotë të reformës në drejtësi dhe forcimin e shtetit të së drejtës.”. /Opinion.al
