Paketa e re fiskale që ka hyrë në fuqi më 1 Janar parashikon lehtësira për bizneset me xhiro vjetore nga 8 deri në 14 milionë lekë. Ato do të paguajnë 5% taksë të tatimfitimit (dividentit) nga 15% që e kishin deri në 2018.
Kryeministri Edi Rama bashkë me ministrin e shkarkuar të Financave, Arben Ahmetaj vizituan sot një biznes që përpunon pllakat e mermerit, për të folur për taksat e reja.
Ahmetaj tha se “sot janë 91% e sipërmarrjeve shqiptare që paguajnë 0 ose 5% tatimfitimi, si dhe 98% e të punësuarve që paguajnë 5.5% taksë pune”.
Kryeministri Rama deklaroi veç të tjerash se, kjo lehtësi fiskale për biznesin do të përkthehet në më shumë vende të reja pune, si dhe në rritjen e pagave të të punësuarve në sektorin privat.
“Në fakt, kjo është zona më delikate e punësimit. Të gjithë bizneset, nga 8 milion në 14 milion xhiro vjetore, që, deri dje e kishin 15% taksën e fitimit, e kanë 3-fish më të ulët nga sot, por kanë kapacitete punësimi dhe vetëpunësimi shumë të mëdha. Ajo që është më e rëndësishmja, në këndvështrimin tonë, është që, duke ju lehtësuar 3-fish, ju japim mundësi, e para, që të zhvilloheni me investime të reja dhe besoj, menjëherë, ju do mendoni për një investim të ri për tu zgjeruar, për tu konsoliduar dhe e dyta, për të rritur punësimin dhe për të rritur pagat”, deklaroi kryeministri Rama.
Ai shtoi nga ana tjetër se është e nevojshme të ulet numri i atyre që shkojnë në universitet dhe të rritet numri i atyre që shkojnë në arsim profesional dhe në kolegje profesionale dyvjeçare, që të bëhen specialistë, në mënyrë që të mos paguhen të huajt për një punë profesionale.
