TIRANË- Kryeministri Edi Rama duke folur në tryezën për reformën zgjedhore tha se është e nevojshmë të depolitizojmë komisionet zgjedhore.
Pjesë nga fjala e Ramës
“Nevoja për të kapërcyer traditën dhe për të depolitizuar komisionet zgjedhore, besoj se jemi sot në kohë për ta bërë këtë hap. Është një hap i kërkuar tradicionalisht dhe para cdo reforme zgjedhore nga partnerët ndërkobmëtarë, nga ekspertët e ODIHR. Një hap që të gjithë kemi ngurruar ta hedhim për një sërë arsyesh që dihen.
Reforma zgjedhore duhet të garantojë të gjithë palët dhe nëse për të gjitha reformat e tjera konsensusi është i dëshirueshëm, për këtë reformë konsensusi është i domosdoshëm. Nuk mund t’i privohet asnjë pale, mundësia për të hyrë në fushën e betejës zgjedhore me rregulla të barabarta për të gjithë duke përdorur vullnetin e shumicës.
Kërkon një diskutim çështja e reklamave elektorale, është pjesa më e shtrenjtë e fushatës zgjedhore, dhe pjesa më e errët në shumë aspekte.
Eshtë domosdoshmëri për të adresuar në mënyrë më efikase edhe çështjen e korrupsionit zgjedhor, i cili krahasuar me të shkuarën është tkurrur në mënyrë të ndjeshme por mbetet një shqetësim në zonat më të varfra dhe sidomos në rastet kur prevalon një mendësi tradicionale e fisit apo e klanit. Jam i bindur që reforma në ka dhënë një bazë të re shumë solide edhe për të pasur një proces zgjedhor më të mirë”.
