Kandidati i Partisë Demokratike në qarkun e Tiranës, Jonathan Pano, i ftuar në emisionin “Opinion”, në Tv Klan, ka deklaruar se nëse kjo forcë politike fiton zgjedhjet e 11 majit, brenda vitit do të ekzistojë Ministria e Familjes.
Kjo ministri, sipas Panos, e frymëzuar nga sistemi i Hungarisë, do të arrijë të sjellë frymën në vend se familja nuk është një shpenzim, por investim. Një institucion i tillë shihet si pjesë e programit të Partisë Demokratike, për shtimin natyror të popullsisë në vend, pas rritjes së emigrimit së shqiptarëve.
Pano sakaq u shpreh dhe me ironi ndaj maxhorancës, kryesisht kreut të qeverisë, Edi Rama, për epitetet që ky i fundit i vë opozitës, duke e cilësuar bufë e kënetë. Sipas kandidatit demokrat, Rama e sheh vetën si “Mësia” që do shpëtojë shqiptarët.
“Rama ka një gjë interesante. Në tipin e vet është përpjekur gjithmonë që të jetë folklorik, ka fituar me tepsi, tallava, timon, tani fillon me kënetë. Tani është bërë më filozofik, këneta që është ferri, parajsa që është BE, edhe unë që jam Mesia që doju shpëtoj nga ferri e do ju çoj drejt parajsës. Por ka një problem, ne nuk po shohim asnjë program konkret përsa i përket PS, ndërkohë ne po vijmë me një paketë e cila do u vijë në ndihmë të qytetarëve të Shqipërisë. E një nga propozimet që kemi sjellë, duke marrë parasysh shpopullimin, se si po na vjen shpopullimi mo? Është fakt! Një problem që ne kemi me socialistët është relativizimi i së keqes, që thonë është dukuri globale, po ndodh gjthandej.
Kemi ardhur në një pikë që na duhet për të vendosur se çfarë do të bëjmë për vazhdimësinë tonë etnike. A do ta vazhdojmë me shqiptarët, apo do ta fillojmë me njerëz nga jashtë e të miksohemi këtu.
Në 2022 unë isha në Hungari. Hungaria po bën një punë fantastike përsa i përket politikave fiskale pro-familjes, ka një ministri të familjes. E thash, ore, këta qenkan në të njëjtën problem, sepse edhe Hungaria para se të futej në BE kishte të njëjtën hallë. Do futen në BE, pjesa që janë këtu do të ikin. Të njëjtin problem kemi edhe ne. Pra, çfarë mund të mësojmë nga Hungaria? Kemi marrë një model, që është një model shumë i bukur, të krijojmë ministrinë e familjes në këtë vend, që ta shikojë familjen si investim dhe jo si shpenzim. Për këtë arsye, në qeverinë Berisha 2025, do të fillohet për herë të parë në Shqipëri, ministria e familjes.“, u shpreh Pano.
Sakaq, kandidatja e Partisë Socialiste për qarkun Tiranë, Edlira Dyrmishaj, u shpreh se ideja e ministrisë së familjes i duket interesante, e beson se mund të gjejë përkrahje. Por ajo më pas sqaroi “polemikën” nëse PS ka apo jo një program, pas akuzave që Berisha i ka bërë Ramës se i ka “vjedhur” paketën. Ajo u shpreh se numri 5 nuk është rastësi në këto zgjedhje, pasi prezantohen 5 pikat kryesore të programit socialist: pensionet, arsimi, pagat, strehimi, mirëqenia e shëndetësia.
“Më pëlqen shumë kjo ideja, e besoj se do gjejë shumë përkrahje. Problemi qëndron se çfarë sfidash do duhet të përballojë kjo ministri përballë kësaj politikës së madhe. Megjithatë, përsa i përket programit të PS, meqë po flasim kemi program, apo s’kemi program. Besoj se të gjithë e kemi parë simbolikën që postohet me numrin 5, për mua nuk është e rastësishme aspak. Janë 5 pika kryesore të programit të PS, për këtë fushatë elektorale, duke filluar që nga pensionet, arsimi, rroga, strehimi për kreditë e buta dhe për lehtësimin e jetesës së qytetarëve dhe shëndetësia.”, u shpreh Dyrmishaj.
