Kryeministri Edi Rama ka zhvilluar një takim me kryeministrin kinez, Li Keqiang. Ata kanë diskutuar mbi mundësitë e bashkëpunimit dhe zhvillimin e projekteve të përbashkëta veçanërisht në infrastrukturë dhe energji.
Takimi është zhvilluar në Dubrovnik të Kroacisë, ku vendet e Europës Qendrore dhe Lindore janë mbledhur në takimin e quajtur “16+1” me Kinën.
Kryeministri Keqiang theksoi se Kina mirëpret zgjerimin e eksporteve shqiptare në Kinë, të produkteve bujqësore dhe specialiteteve vendore shqiptare, të tilla si mjalti, vaji i ullirit apo vera.
“Kina dhe Shqipëria duhet të rrisin komunikimin për të arritur një marrëveshje për përjashtimin reciprok të vizave midis dy vendeve, për të lehtësuar shkëmbimet e të rinjve dhe për të konsoliduar mbështetjen publike për zhvillimin e marrëdhënieve dypalëshe”, ka deklaruar kryeministri kinez.
Mediat kineze shkruajnë se Rama ka përshëndetur miqësinë tradicionale mes dy vendeve dhe ka bërë thirrje për një festë madhështore të 70 vjetorit të krijimit të lidhjeve dypalëshe.
“Shqipëria në mënyrë aktive mbështet projekte bashkëpunimi me Kinën dhe shpreson të zgjerojë eksportin e produkteve bujqësore në Kinë”, tha Rama, duke shtuar se ai pret që Kina të ofrojë komoditet për njerëzit e talentuar shqiptarë në vendin aziatik./Opinion.al
