Kryeministri Edi Rama ka pritur pasditen e sotme në një takim deputetët fitues të Partisë Socialiste në zgjedhjet parlamentare të 11 majit.
Gjatë fjalës së tij në Pallatin e Brigadave, Rama u shpreh se PS-së, i duhen fitoret për të përmbushur misionin historik, anëtarësimin e Shqipërisë në BE, brenda dekadës.
Pjesë nga fjala e Ramës:
“Partia nuk është qëllim, por mjet për të luftuar për qëllimet. As fitorja në zgjedhje nuk është qëllim në vetvete, por për të arritur qëllimet duhet të fitosh zgjedhjet.
Fitoret na duhen për të përmbushur misionin historik që kemi, për të ndryshuar përgjithnjë Shqipërinë, për të garantuar drejtësinë, forcuar sigurinë, rritur reputacionin ndërkombëtar, duke bërë histori me anëtarësimin e vendit tonë në BE, gjatë kësaj dekade. Na duhet një punë e madhe me veten, përsëri me veten, akoma më shumë këtë herë. Duhet ta nisim nga vetja, disa gjëra duhen parë ndryshe, duhen kuptuar ndryshe dhe duhen bërë ndryshe.”
