Kryeministri Rama ka sulmuar sërish ditën e sotme prokurorin e Durrësit Arjan Ndoja. Gjatë takimit të bashkëqeverisjes, Rama gjeti momentin për të akuzuar edhe njëherë prokurorin, pa i përmendur emrin, se po u bën shantazh nëpunësve të shtetit dhe paralajmëroi se së shpejti do të dalë përpara drejtësisë.
“Ju e patë vetë javën e kaluar një rast flagrant i shkeljes së ligjit dhe jo vetëm por edhe i transformimit të një figure të sistemit të drejtësisë të përfaqësues të interesave të krimit ku sigurisht nuk do i shpëtojë ndëshkimit, por kur vjen puna te ndërhyrja në proces është e pamundur për qeverinë dhe pushtetin ekzekutiv. Se kushtetuta përcakton qartë kufizimet që ne kemi, pavarësisht se mund të jetë e drejtë ajo që qytetari kërkon pas një padrejtësie në dyert e gjykatave” tha Rama.
Pas vendimit të gjykatës së Durrësit për të lënë në arrest drejtorin e AKSH-së, zëvendëskryeministri Braçe sulmoi prokurorin e çështjes, Arjan Ndoja se po bënte “presion kriminal” ndaj të akuzuarit Liridon Pula. Një ditë më vonë, Braçe e bëri veten edhe gjykatës, duke thënë se prokurori në fjalë po mban në burg padrejtësisht një zyrtar të pafajshëm.
Në të njëjtën linjë ishin edhe akuzat e kreut të qeverisë, Edi Rama, i cili tha në parlament se “një prokuror në Durrës i lidhur me krimin e organizuar, po u bënte presion punonjësve të shtetit”.
Ndër të tjera gjatë fjalës së tij në takimin me qytetarët ditën e sotme kryeministri tha se pastrimi i llumit sipas tij ka edhe efekte negative të përkohshme. Megjithatë sipas tij efektet negative nuk janë mos pasja funksionale e gjykatave por fakti që prokurorët dhe gjykatësit sipas tij do të shfrytëzojnë momentet e fundit për të përfituar nga korrupsioni.
“Pastrimi i llumit nga sistemi i drejtësisë ka edhe një efekt negativ të përkohshëm por të rëndë për qytetarët, pasi shumë prokurorë dhe gjykatës të zhytur deri në fund dhe e dinë se nuk do e kalojnë po e shfrytëzojë duke thënë ‘të kapim çfarë të kapim’. Sistemi i ri i drejtësisë kërkon kohë, ndërsa vettingu do ta pastrojë dhe sistemi do të ndëshkojnë ata që janë nxjerrë”
Për herë të parë kryeministri Rama pranoi se ka kushte nga Bashkimi Europian në procesin e integrimit. Por gjatë fjalës së tij në takimin me qytetarët ai e përdori këtë për të rikujtuar dënimin ndaj prokurorëve dhe gjykatësve.
“Më vjen mirë që është kthyer në kusht nga BE dhe të jenë të sigurt që do të rikthehen për të dhënë llogari për pasuritë e tyre dhe ata që bëjnë krime ndaj qytetarëve për të përfituar para të zezë për të marrë ‘rroga’, shpërblime nga organizata kriminale, drejtësia mbi ta mund të vonojë edhe ca, por nuk do të harrojë. Ka arritur në 793 numri i masave ndëshkimore falë hetimeve administrative nga platforma. 46 masa në proces për nëpunës, shefa apo drejtues zyrash. Atyre që i bien shkurt dhe thonë se kështu duhet të funksionojë shteti duke shkuar deri te qeveria, u them se kështu funksionon kudo edhe në shtetet më të zhvilluara” tha Rama
Kjo nuk është hera e parë që prokurori Ndoja ndodhet në qendër të akuzave. Pak më shumë se një dekadë më parë ai është hetuar për pastrim parash dhe fshehje pasurie, por akuzat ndaj tij janë hedhur poshtë.
Neni 7 i Kushtetutës së Republikës së Shqiperisë sanksionon se sistemi i qeverisjes në Shqipëri bazohet në ndarjen dhe balancimin midis pushteteve ligjvënës, ekzekutiv dhe gjyqësor. Te treja degët e pushtetit janë të ndara dhe të dallueshme nga njera-tjetra.
Megjithë të kaluarën të debatueshme të Ndojës, sulmet e dy përfaqësuese më të lartë të ekzekutivit ndaj një zyrtari të sistemit të drejtësisë kanë ngritur shqetësim në Këshillin e Lartë të Prokurorisë. /Opinion.al
