Kryeministri Edi Rama ka folur me tone të ashpra në mbledhjen e përbashkët të qeverive të Kosovës dhe Shqipërisë që po mbahet në Pejë. Ndër të tjera ai tha se ministrit të Kosovës i është kërkuar në Serbi të heqë nga fjalimi, fjalën “Republika e Kosovës” e në përgjigje të kësaj Rama iu drejtua Serbisë me sharjen në anglisht “What the Fuck!” Më tej ai tha se taksa prej 100 per qind ndaj produkteve serbe nuk është vendim ekonomik por politik si përgjigje e goditjeve pas shpine që Serbia i ka bërë Kosovës.
Kreu i qeverisë shqiptare shtoi se “e drejta ndërkombëtare nuk njeh gjysmë-shtete dhe nuk njeh gjysmë-njerëz”, duke nënvizuar se “prandaj jemi të zhgënjyer nga qasja e BE-së në lidhje me pavarësinë e Kosovës dhe lëvizjen e lirë të qytetarëve të saj”.
Pjesë nga fjalimi i Kryeministrit Rama
Frenezia me të cilën Serbia po e bllokon pranimin e Kosovës në instanca rajonale dhe ndërkombëtare dhe deri tek kurajo e pa shpjegueshme për të kërkuar tërheqjen e njohjeve të Kosovës si Republikë nuk është thjesht shqetësuese, por sfiduese. Deri në dekurajimin e procesit të dialogut është provokuese deri në nevojën për reagime proporcionale.
Asnjë presje nuk i hiqet sot përfundimit të një ish-ministri britanik sipas të cilit bllokimi i njohjeve të Kosovës është inkurajimi më cinik ndaj enklave kriminale ku bashkëpunojnë mafiet po aq multietnike sa popullësia e Kosovës. Përpjekjet e Serbisë, shkruan ai, kanë cënuar ekonomikisht të gjitha komunitetet pa përjashtim. Fermerët kosovarë nuk shesin dot prodhimet e tyre në Serbinë e Jugut, kontenierë apo vagonë të tërë me fruta dhe perime të kërkuar nga tregjet e Europës veriore duhet të dilnin përditë nga Kosova. Por edhe këtu si kudogjetkë Serbia bllokon.
Po Romingu dhe lënia e Kosovës jashtë tij? Në këtë kontekst kaq të posaçëm goditjesh të vazhdueshme pas shpinës e Kosovës nga fqinji i madh merr dhe shpjegimin tarifa 100% për produktet serbe.
Është një vendim normal në kushte irracionale siç ato që përvijonë vijimësisht nga qasja e Serbisë.Tarifa 100% është reagim politik ndaj ekseseve të vazhdueshme të një sjellje supermatiste të Serbisë ndaj Kosovës. What the fuck! Ne nuk mund të mohojmë se marrëdhëniet dy palëshe nuk janë pa vështirësi, por ama këto vështirësi janë të kapërcyeshme kur ka vullnet të mirë për të shkuar drejt një horizonti të përbashkët.
Zero tarifa dhe zero barrierave tarifore brenda 6 mujorit të parë Shqipëri- Kosovë. Nëse jemi këtu jemi këtu dhe duhet ta bëjmë dhe nuk ka nevojë të mblidhemi sërish. Sot është koha të vëjmë 100 % tarifa në veri të Kosovës dhe zero % në jug të Kosovës.
*Mbledhja live e dy qeverive shqiptare në Pejë
