PS-ja i kthen përgjigje negative PD-së për të rinegociuar ligjin e Vetingut. Përmes Xhafës, Rama i thotë Bashës se tani s’ka më kohë për negociata, por duhet të presim verdiktin e Kushtetueses. Kryetari i Komisionit të Posaçëm të Reformës në Drejtësi, Fatmir Xhafaj e ka cilësuar absurde kërkesën e Bashës.
“Kjo ishte gjëja më absurde që kisha dëgjuar ndonjëherë, që partitë paskan fuqi të zhbëjnë Gjykatën Kushtetuese”, tha ai.
Më tej, Xhafaj do të shprehet: “PD nuk mori pjesë në debatin për Vettingun, nuk u angazhua fort, nuk arrij ta kuptoj. Përfundimisht e bëri kauzë në Kushtetuese për të bllokuar procesin dhe sot kërkon që të mblidhen dy partitë që t’i thonë Gjykatës se biem dakord”.
“Çështja është në Gjykatë, pavarësisht se nuk jam i bindur me vendimin e Kushtetueses për ta pezulluar, gjithsesi respektoj institucionin dhe po presim me qetësi opinionin e Komisionit të Venecias, i cili javën e ardhshme do të jetë publik. Shpresoj që Gjykata ka qenë serioze në pyetjet e dërguara në Kushtetuese dhe po ashtu të respektojë opinionin e Venecias. Prova e fortë e Kushtetueses do të jetë në respektimin e opinionit të Venecias. Do të respektojmë me qetësi vendimet e Kushtetueses”, deklaroi deputeti socialist, Fatmir Xhafaj njëherësh kreu i komisionit të reformës.
Një ditë më parë, nga selia e PD-së, Basha iu drejtuar Ramës me fjalët: Hajde të amendojmë ligjin pa pasur nevojë për vendimin e Gjykatës Kushtetuese. Unë jam gati që tani. Kushtetuta thotë se vetingun duhet ta bëjë Kuvendi, kurse Edi Rama do që vetingun ta bëjë ai vetë me drejtorët dhe vartësit e tij”.
