Kryeministri Edi Rama ka propozuar Ditmir Bushatin për postin e Përfaqësuesit të OSBE, për lirinë e medias.
Aktualisht, Rama drejton presidencën e OSBE dhe ky është propozimi i dytë që ai bën për ish-kreun e diplomacisë shqiptare, pasi fillimisht e ngarkoi si të dërguarin e tij të posaçëm në OSBE.
Edi Rama, vlerëson njohjet e Bushatit në çështjet shumëpalëshe dhe veçon faktin se është ministri i Jashtëm më jetëgjatë në 30 vjet demokraci, për të vlerësuar se ai është kandidati më i mirë për të zëvendësuar Harlem Dezir.
Ky i fundit ka qenë një nga zërat kritik ndaj qeverisë shqiptare në lidhje me paketën antishpifje. Desir kërkoi fillimisht që në prokejtligj të bëheshin disa ndryshime. Më pas ai deklaroi se drafti ishte në përputhje me rekomandimet e OSBE-së. Megjithatë kritikat nga Bashkimi Europian dhe Këshilli i Europës bën që Desir të shprehej se implementimi i disa pikave të diskutueshme të projektligjit do të monitorohej nga afër.
Përfaqësuesi i medias, zgjidhet me konsensus nga 57 vendet anëtare të OSBE./ Opinion.al
