Në një intervistë për gazetën italiane “Corriere della Sera” Kryeministri shqiptar Edi Rama shprehu përsëri synimin e qeverisë së tij, për ta anëtarësuar vendin në BE në vitin 2030, ndërsa e quan të suksesshëm vitin 2024 përsa i përket integrimit.
“Ishte një vit i shënuar nga një psherëtimë lehtësimi, pasi më në fund jemi ulur në tryezën e negociatave për anëtarësim në Bashkimin Evropian, pas një rrugëtimi të gjatë reformash, plot me pengesa të vështira. Ndjesia është si ajo e marinarëve që, pas një udhëtimi të gjatë, më në fund shohin tokën. Nuk jam profet. Shpresoj në vitin 2030”, tha Rama.
Në këtë intervistë që mban titullin “‘Shqipëria në BE në 2030’, Edi Rama premton dhe mbyll TikTok” kryeministri thotë se vijimi i procesit drejt anëtarësimit të plotë mbetet një nga sfidat kryesore për vendin, ndërsa BE e cilëson si një krijesë të papërfunduar.
“Gjithçka që do të na çojë drejt hapit të madh historik të hyrjes në Bashkimin Evropian dhe ta transformojë Shqipërinë në një vend ku e kaluara nuk mund të marrë peng të ardhmen. Problemi është ndoshta që liderët e sotëm, veçanërisht në Evropë, kanë më pak mundësi për të ndikuar. Kjo sepse çështjet themelore kanë dalë jashtë kontrollit të qeverive kombëtare, ndërsa Bashkimi Evropian mbetet një krijesë e papërfunduar, dhe kjo është çështja më e madhe”, tha Rama.
Rama refuzon të vlerësojë veten në drejtimin e vendit, por thekson se kërkon një mandat të katërt me fitore të thellë në zgjedhjet e 11 Majit.
“Nuk më takon mua t’i jap vetes një vlerësim. Në majin e ardhshëm, do të mirëpres me përulësi votën e qytetarëve, sepse është ajo që ka rëndësi. Të kandidoj për një mandat të katërt dhe të kem një mbështetje që premton shumë është tashmë diçka e veçantë”, tha Rama.
Thotë se Shqipëria dhe Italia kanë marrëdhënie miqësore që i kalon kufijtë e ndarjes nga ideologjia politike.
“Nuk do ta shihja si një çështje ideologjike. Siç e kam thënë shpesh, me Italinë kemi një marrëdhënie shumë të veçantë për t’u kufizuar nga përkatësitë ideologjike”, u shpreh kryeministri.
Zgjedhjen e Donald Trump President të SHBA e konsideron si diçka që pritej, ndërsa flet dhe për ndikimin që do të ketë ai për Europën.
“Ishte e parashikueshme. Ai është kthyer në majën e botës pasi ka qenë buzë humnerës, duke prekur madje edhe vdekjen. Ai kurrë nuk ka fshehur bindjen se Zoti kishte një arsye të veçantë për ta mbajtur gjallë ndërsa kandidonte për Shtëpinë e Bardhë. Duke vazhduar paralelen me Zotin, ai nuk mund të bënte asgjë më bujare për të përpjekur të zgjojë Evropën. Shpresoj që kjo përpjekje të japë rezultatet e dëshiruara, përndryshe mund të ketë dhimbje të mëdha përpara”, tha Rama.
Kryeministri Rama thotë se ajo që dëshiron më shumë që të ndodhë që gjatë vitit 2025 është përfundimi i luftës mes Ukrainës dhe Rusisë.
Klan News
