Mazhoranca qeverisëse nuk tërhiqet nga mbajtja e zgjedhjeve lokale. Kryeministri Edi Rama nga Kuvendi tha se është bërë çdo gjë që opozita të marrë pjesë në zgjedhje, por sipas tij pas vendimit të opozitës, rruga për lokalet do të vazhdojë përpara.
“Lulzim Basha ka vendosur t’i përdorë zgjedhësit si ‘mish për top’ duke u fshehur pas tyre. Kjo është shumë e rëndë, e padëgjuar dhe e papranueshme nga askush. As nga vetë shumica dërmuese e zgjedhësve të Lulzim Bashës dhe Monika Kryemadhit. Dhe ne nuk kemi ndonjë zgjedhje tjetër përveçse të vijojmë rrugën tona pa u ndalur të merremi me të. Dmth pa devijuar nga rruga e 30 qershorit, pavarësisht rreziqeve të një procesi kur dy parti politike përbetohen se do të pengojnë vullnetin e popullit për të zgjedhur kryetarët e bashkive. Unë i mirëkuptoj ata që mendojnë se zgjedhjet pa këto parti janë anormale, por kjo nuk është as zgjedhja jonë”, deklaroi Rama.
Kryeministri tha se ka bërë çdo gjë që zgjedhjet të mos mbahen pa opozitën dhe për këtë ai përmendi marrëveshjen e 2017.
“Ne në këndvështrimin tim kemi bërë çdo gjë, që kjo të mos ndodhte. Mund të bënim më shumë, mbase, por nuk e di. Është mirë të gjithë ta kujtojnë se çfarë ne kemi bërë. Jemi ne që e kemi dhënë provën se mes një palë zgjedhjesh pa opozitën dhe zgjedhjet me opozitën, kemi parapëlqyer të dytën dhe kemi sakrifikuar politikisht. Prova është në sytë e kujtdo që ka një kujtesë të gjatë sa dy vjet”. /Opinion.al
