Para disa ditësh, studentët paralajmëruan rinisjen e protestave pasi sipas tyre kërkesat nuk u zbatuan nga qeveria. Sot, kryeministri Edi Rama ka thënë se Rektori i Universitetit të Tiranës Mynyr Koni ka penguar vlerësimin e titujve akademikë, nuk ka ofruar bashkëpunim duke e akuzuar edhe për inskenime protestash. Në prezantimin e bibliotekës dixhitale “Ulibrary.rash.al”, Rama tha se nëse situata vazhdon kështu, mund universiteteve mund t’u hiqet autonomia.
“Kush kujton se do të kërcënojë qeverinë me inskenime protestesash apo krijime situatash që turbullojnë gjendjen e brendshme të universitetit me demek për këtë e për atë, por ndërkohë në fakt për t‘iu shmangur kësaj e ka gabim. Ne jemi këtu për të bërë reformat dhe për t’i çuar ato deri në fund. Nuk jemi këtu për të siguruar reforma në karrige, jemi këtu për të bërë detyrën dhe protesta e studentëve ishte një shtysë shumë e rëndësishme. Urojmë që të mos ndërhyjmë në ligj për të marrë në kontroll një zonë që i takon autonomisë universitare. Por nuk mund të lëmë në dorë jetën e fëmijëve tanë. Kjo nuk është diçka që dëshirojmë dhe nuk është më e mira për t’u bërë. Nuk do ketë harresë dhe bllokim të procesit të vlerësimit të titujve akademikë”, është shprehur Rama.
Kryeministri la të kuptohej se nëse nuk do të ketë reflektim nga ana e Mynyr Konit, mund të ketë edhe një iniciativë për ta shkarkuar.
“Kemi rezerva lidhur me drejtimin e Universitetit të Tiranës. Është koha për ta adresuar inkompetencën e plotë dhe mungesën e vullnetit alarmant të konstatuar nga ana e Rektorit të Universitetit të Tiranës. Kjo është e papranueshme”, tha Rama./Opinion.al
